Фото: Халқаро пресс-клубТашқи ишлар вазирининг биринчи ўринбосари Илҳом Неъматовнинг фикрига кўра, Ўзбекистон сиёсий изоляциядан тўлиқ фориғ бўлган. Буни дунёнинг кўплаб мамлакатлари ҳам яхши билиб турибди. Бу борада халқаро экспертлар ҳам ижобий фикрлар билдирмоқда.
«Ўзбекистон кейинги 3 йил давомида давлатимиз раҳбарининг сиёсати туфайли изоляциядан чиқдими, чиқяптими, деган саволлар жуда кўп, албатта. Шуни айтиш керакки, Ўзбекистон изоляциядан мутлақо чиқиб бўлди. Ҳеч қандай хавотир йўқ.
Жаҳон экспертлари шуни айтяптики, Ўзбекистон президентининг очиқ, дўстона ва конструктив сиёсати туфайли бугунги кунда Марказий Осиёда мутлақо соғлом сиёсий иқлим, дўстона вазият пайдо бўлди. Шунингдек, Марказий Осиё давлатларининг бир-бири билан ҳар томонлама манфаатли алоқалари учун жуда катта қулай шароит яратилди. АҚШ, Европа иттифоқи, Россия, Қозоғистондаги экспертлар ҳам шундай баҳо беряпти.
Яна бир бор айтиш мумкинки, Ўзбекистон изоляциядан тўлиқ чиқиб бўлди ва бунга ҳеч қандай тўсиқ йўқ. Мисол келтирсак, бир йил аввал Самарқандда инсон ҳуқуқлари бўйича жуда катта Осиё форуми бўлди. Унда кўплаб инсон ҳуқуқлари билан шуғулланадиган халқаро ташкилотлар вакиллари юртимизда очиқлик сиёсати давом этаётганини таъкидлашди.
Давлатимиз раҳбарининг гаплари билан айтадиган бўлсак, биз янги давлат қуряпмиз. 25 йил давомида йиғилган жуда катта муаммоларнинг ҳаммасини 3 йил мобайнида ҳал этиш осон иш эмас. Олдимизга қўйган марраларга пайдар-пай эришамиз. Бошланган ислоҳотлар тўхтатилмайдиган жараёнга айланди», — деди Илҳом Неъматов.
Ташқи ишлар вазирлиги расмийсининг Халқаро пресс-клубнинг навбатдаги сессиясида айтишича, кейинги 3 йил давомида Ўзбекистон президенти даражасида 61 та ташриф амалга оширилган. Бу аввалгиларга солиштирганда, 5-6 баравар кўп.
Шундан 37 таси Ўзбекистон раҳбарининг чет элларга ташрифи бўлса, 24 таси бошқа хориж давлатлари президентларининг Ўзбекистонга ташрифидан иборат. Бу ташрифлар доирасида 120 дан ортиқ олий даражадаги музокаралар ўтказилди.
Ташқи сиёсат, иқтисод, хавфсизлик, инвестиция ва гуманитар масалаларга оид 500 дан зиёд ўта муҳим икки ва кўп томонлама битимлар имзоланди.