Ўзбекистон Бош прокуратурасида одам савдосига қарши курашиш бўйича Республика Идоралараро комиссиясининг навбатдаги йиғилиши бўлиб ўтди. Бу ҳақда 26 декабрь, жума куни Бош прокуратура матбуот хизмати хабар бермоқда.
Йиғилишда одам савдосига қарши курашиш бўйича Республика Идоралараро комиссияси ҳамда унинг доимий фаолият кўрсатувчи таҳлилий ишчи гуруҳи аъзолари, Бош прокуратуранинг ходимлари, Қорақалпоғистон Республикаси Вазирлар Кенгаши раиси, Ички ишлар вазири, прокурори, Сирдарё вилояти ҳокими, прокурори ва ички ишлар бошқармаси бошлиғи иштирок этдилар.
Мажлисда Қорақалпоғистон Республикаси ва Сирдарё вилоятида одам савдосига қарши курашишга қаратилган қонунчилик ижроси юзасидан ўтказилган мониторинг натижалари, шунингдек республикада аҳолини, айниқса касб-ҳунар коллежлари битирувчиларини бандлигини таъминлаш, янги иш ўринларини яратиш ҳамда белгиланган тартибда чет давлатларда ишлаётган Ўзбекистон фуқароларининг ижтимоий ҳимояси масалалари муҳокама этилди.
Одам савдосига қарши курашиш бўйича ушбу ҳудудларнинг идоралараро комиссиялари, давлат органлари, жамоат ташкилотлари ҳамда ўзини ўзи бошқариш органлари томонидан соҳадаги қонунчилик ижросини таъминлашда муайян ишлар амалга оширилганлиги қайд этилди.
Одам савдоси билан боғлиқ жиноятларнинг олдини олиш, унинг оғир оқибатлари ҳақида аҳолини хабардор этиш мақсадида “Одам савдоси – давр муаммоси” тағрибот лойиҳаси доирасида 1,5 мингдан ортиқ тадбирлари ўтказилиб, уларда 120 мингга яқин фуқароларнинг иштироки таъминланган. Жамоат жойларида одам савдоси жиноятларидан огоҳ этувчи кўргазмали тарғибот воситаларини ўрнатиш ҳамда тарқатишга алоҳида эътибор берилган, натижада ушбу ҳудудларда одам савдоси жиноятларининг камайиши кузатилган.
Шунингдек, аҳоли бандлигини таъминлаш ва янги иш ўринларини яратиш одам савдосининг олдини олишда муҳим омил бўлишини инобатга олиб, бу борада тасдиқланган Дастурлар ижросини таъминлашда муайян ишлар амалга оширилган. Маълумотларга кўра, жорий йилнинг 11 ойида иш ўринларини яратиш ва аҳоли бандлигини таъминлаш Дастурига мувофиқ республика бўйича 930,5 мингта янги иш ўринлари яратилган ҳамда ўтказилган 1,1 мингта бўш иш ўринлари ярмаркасида 60,8 минг нафар фуқароларга ишга йўлланма берилган.
“Шу билан бирга, Қорақалпоғистон Республикаси ва Сирдарё вилоятидаги айрим туман-шаҳар комиссияларида одам савдоси жиноятларининг олдини олиш ва унга қарши курашишда ҳамда мамлакатда иш ўринларини ташкил этиш, аҳолини айниқса коллеж битирувчиларини бандлигини таъминлашда хато ва камчиликларга йўл қўйилганлиги танқид остига олинди”, – дейилади Бош прокуратура хабарида.
Тадбирда жойларда ҳудудий идоралараро комиссиялар, давлат идоралари, жамоат ҳамда нодавлат ташкилотлари бу борадаги фаолиятни янада жадаллаштиришлари, ўзаро ҳамкорликни кучайтиришлари лозимлиги таъкидланди.
Йиғилишда кун тартибидаги масалалар юзасидан тегишли идоралар раҳбарларининг ҳисоботлари эшитилиб, мавжуд камчиликларни бартараф этиш юзасидан фикр-мулоҳазалар билдирилди. Йиғилиш якунида мавжуд камчиликларни бартараф этиш ва ушбу йўналишдаги фаолият самарадорлигини оширишга қаратилган қарор қабул қилинди.
Манба:
Kun.uz