Тошкент шаҳри аҳолиси шакарнинг қимматлашишидан хавотирланиб, уни кўпроқ миқдорда ғамлашга тушиб кетишди. Бунинг оқибатида баъзи дўконлар олдида навбатлар юзага келмоқда.“Жамоатчилик назорати” гуруҳи иштирокчиларининг ёзишича, бу маҳсулотнинг нархи ошгани кузатилмоқда – “Авиасозлар” (собиқ Кадишев бозори) бозорида унинг бир килограмми 3900 сўмдан сотилмоқда. Ваҳоланки, бундан бир неча кун аввал бир килограмм шакар 2900 сўмдан сотилган эди.
Ҳар йили баҳор мавсумида юртимизда истеъмолчилар орасида шакар саросимаси авж олиши одат тусига айланиб қолди. Ўтган йили “оқ қум”нинг сунъий равишда яратилган тақчиллиги мисли кўрилмаган ўлчамларга етди – унинг нархи 2 баробарга қимматлаб, Тошкентнинг йирик супермаркетларида унинг нархи аввалгидек арзон ҳолда сақланган ҳолда киши бошига 2 кг дан кўп бўлмаган миқдорда сотилган эди.
Ўзбекистон Давлат рақобатчилик қўмитаси бу ҳолат юзасидан тафтиш ўтказиб, олибсотарларга қарши чора кўришга ваъда берган эди. Қўмита томонидан чоп этилган баёнотда шакар сотиб олиш билан боғлиқ саросимасига “бу маҳсулотга, шу жумладан, бозор иштирокчилари – улгуржи воситачилар орасида ҳам, чакана савдо нуқталарида ҳам тил бириктириш йўли билан “сунъий тақчилликни” юзага келтиришга қаратилган оддий олибсотарлик фаолияти” сабаб бўлгани айтилган эди.
Аҳоли орасида Ўзбекистонда шакар “тақчиллиги”га мамлакатдаги шакар заводларидан бирининг ёпилиши сабаб бўлгани ҳақида миш-миш тарқалмоқда. Ҳозирда юртимизда иккита шакар заводи – “Хоразм шакар” ва ўтган йилда очилган “Ангрен шакар” заводлари фаолият юритмоқда. Бу заводларнинг кунлик ишлаб чиқариш қуввати минг тонна шакарни ташкил қилади.
Манба: www.kun.uz