Rossiyalik robot-texnik Mark Oleynik asos solgan Londonning Moley firmasi dunyodagi birinchi robot-oshpazni yaratdi. Robotning taqdimoti Gannoverda o‘tkazilgan robot texnikasi yarmarkasida bo‘lib o‘tdi. Bu qurilma haqida Wired internet-nashri o‘zining reportajida xabar bermoqda.Robot konforka, rakovina va plitadan iborat ishchi yuzaga o‘rnatilgan ikkita manipulyatordan tashkil topgan. NASAning robot texnikasi loyihalarida ishtirok etuvchi Londonning Shadow Robotics firmasi manipulyatorlarni harakatchanlik bilan ta’minlagan. Har bir roboqo‘lda 20 ta motor, 24 ta sharnir va 129 ta datchik mavjud. Tizim kameraga yozib olingan oshpaz qo‘llari harakatlarini takrorlay oladi.
Londonda qurilmaning taqdimoti davomida robot-oshpaz krabli sho‘rva tayyorlab, MasterChef televizion tanlovi g‘olibi bo‘lgan Tim Andersonning harakatlarini takrorlagan. Robot avvaldan tayyorlangan masalliqlarni aralashtirib, ularga piyoz, ziravorlar qo‘shgan va 20 daqiqadan sal ko‘proq vaqt ichida sho‘rva tayyor bo‘lgan. Shundan keyin robot tayyor bo‘lgan sho‘rvani kosalarga suzib, unga rayhon va bir necha tomchi qayla qo‘shib tortiq qilgan.
Hozircha robot faqat bittagina resept bo‘yicha taom tayyorlay oladi, biroq qurilmaning sotuvga chiqarilishiga qadar uning yaratuvchilari uni 2000 ta taomdan iborat raqamli kutubxona bilan jihozlash hamda foydalanuvchilarga o‘zlarining reseptlarini qo‘shish imkonini berishni rejalashtirishmoqda. Bundan tashqari, robot idish-tovoqlarni ham yuva oladi.
“Robotni taomlar tayyorlashga o‘rgatish lozim. Unda istalgan taomni tayyorlash uchun etarlicha motor va datchitklar mavjud”, deb aytdi Oleynik.
Moley robot-oshpazlarni 2017 yilda sotuvga chiqarishni rejalashtirmoqda. Qurilmaning taxminiy narxi 14 ming dollar atrofida baholanmoqda. Piyozni odamga xos bo‘lmagan tezlik bilan to‘g‘rayotgan manipulyatorlar foydalanuvchilarda qo‘rquv uyg‘otmasligi uchun robot yaratuvchilari uni ataylab odamga nisbatan tezroq ishlay olmaydigan qilib sozlashgan.
Manba: www.kun.uz