Google kompaniyasi o‘zining Jorjiyadagi Ma’lumotlarni qayta ishlash markazi (MQIM) maydonini kengaytirishni rejalashtirayapti. Serverlar, tarmoq qurilmalari va ma’lumotlarni saqlovchi disklarni joylashtirish zarurati tufayli qo‘shimcha maydon talab qilinmoqda.VentureBeat resursining xabar berishicha, Atlantadan g‘arb tomonda joylashgan Duglas okrugi hokimiyati Google bu hududda joylashgan ushbu MQIMni kengaytirishga 300 mln dollar sarflashini inobatga olib, unga ko‘chmas mulk bo‘yicha soliq imtiyozlari berishga rozi bo‘ldi.
Google vakili kompaniya haqiqatan ham ushbu ob’ektni kengaytirishni boshlaganini tasdiqladi. Bu loyihaning amalga oshirilishi kamida 25 ta yangi ish o‘rnini yaratishga imkon beradi.
Google oxirgi yillar davomida bozorning etakchisi Amazon’ning veb-servislari bilan raqobatchilik qilish maqsadida o‘zining bulutli xizmatlarini rivojlantirish bilan birga har yili yangi MQIMlar va boshqa ob’ektlarni qurish uchun milliardlab dollarlar sarflaydi.
Google 2003 yilda ochilgan Jorjiyadagi MQIMga qo‘shimcha ravishda AQShning Janubiy Karolina, Ayova, Oklaxoma, Shimoliy Karolina, Oregon shtatlarida, Chili, Tayvan, Singapur, Finlyandiya, Belgiya, Irlandiya va Niderlandiyada joylashgan MQIMlaridan ham foydalanadi.
Manba: www.kun.uz