Sports.uz o‘zbek futbolidagi eng iqtidorli yosh futbolchilardan biri - Ibrohim Halil Yo‘ldoshev bilan suhbat uyushtirdi.
- «Bunyodkor» sizni kashf etdi, lekin «Paxtakor» sizni qaytarib oldi. «Qaldirg‘ochlar»ni tashlab ketish qiyin bo‘lmadimi?
- Qiyin bo‘lmadi, ammo menga berilgan imkoniyat uchun Vadim Karlenovichdan minnatdorman. Jamoaga kelishim bilan ikki kundan so‘ng asosiy tarkibda maydonga tashlagandi.
- «Paxtakor» safida «Nasaf»ga qarshi o‘yinda sizni zaxiradan maydonga tushishingiz voqealarni o‘zgartirib yubordi. Aytingchi, natijaga ta’sir ko‘rsataman deb o‘ylaganmidingiz?
- Ochig‘i, kutmagan edim. Boz ustiga, zaxiradan tushib o‘yinni o‘zgartirish haqida o‘ylagan bo‘lsam ham, lekin g‘alaba qozonish haqida o‘ylamagandim. Yaratganni irodasi bo‘ldi.
- Asl pozitsiyangiz himoyachi yoki hujumchi?
- Men himoyachi emasman. Hujumda to‘p surish ko‘proq yoqadi. Shunday bo‘lsada, murabbiylar ko‘rsatmasidan kelib chiqib orqa chiziqda to‘p surishim mumkin.
- Siz Shota Arveladze bilan birgalikda ishlagansiz. Endi Piter Xyuistra qo‘l ostida faoliyat olib boryapsiz. Ularning o‘yin uslubi bir xilmi?
- Tashqaridan bir xildek ko‘rinishi mumkin, ammo o‘yin qurishda farq katta. Futbolchi sifatida aytishim mumkin, ular talab qiladigan narsalar bir-birini qaytarmaydi. Xyuistrani o‘z strategiyasi bor deb hisoblayman.
- Klub bilan MTJ sharafini himoya qilishning qanday farqi bor?
- Farqi katta. Klub o‘z yo‘liga. Terma jamoa libosida siz vatan sha’nini himoya qilishingiz kerak. Klubdagi yutuq jamoaniki. Agar, terma jamoada g‘alaba qozonsangiz, butun xalq xursand bo‘ladi. Mag‘lubiyatlar ham shunday. MTJdagi omadsizlikni hamma yuragiga yaqin oladi. Mas’uliyat katta.
-Bizda «iqtidorli bolalar qishloqlarda qolib ketyapti»,- degan atama bor. Xo‘sh, iqtidorli bolalar o‘zi istasa sizga o‘xshab «yorib chiqishi» mumkinmi? Yoki bunga omad kerakmi?
- Hozir Toshkentdagi katta jamoalarning barchasida viloyatdan kelgan yosh futbolchilar shug‘ullanmoqda. O‘ylashimcha, iqtidorli bo‘lsangiz kifoya. Omad shart emas. Barchasini yengib o‘tish uchun mehnat qilish kerak. O‘z ustida tinimsiz ishlagan futbolchilar bir kun yuzaga chiqadi.
- Siz ham Xojimat Erkinov singari Eldor Shomurodovning agenti bilan shartnoma imzolaganingiz haqida mish-mishlar yuribdi. Bu qanchalar haqiqatga yaqin?
- Keling, shu sir bo‘lib qolsin. Hozirdan biror narsa demoqchi emasman. Vaqti kelganida muxlislar, albatta, bilib olishadi.
- Kelajakdagi rejalar qanday? Xorijga yo‘l olish rejangizda bormi?
- Albatta, bor. Nasib qilsa, chet klublarda to‘p surib mahoratimni yanada oshirmoqchiman. Imkon boricha O‘zbekistonda qolmaslikka harakat qilaman. Asosiy maqsadim ham shu. O‘sishni istagan futbolchi, albatta, legioner bo‘lishi kerak. Ana shunda, yangi darajaga ko‘tarilish mumkin.
Yahyoxo‘ja Ulug‘xo‘jayev suhbatlashdi