Ispaniya chempionatining 23-turida "Barselona" o‘z maydonida "Levante"ni yirik hisobda (5:0) mag‘lub etdi. Uchrashuvda 90 daqiqa o‘ynab, 3ta gol urgan va bitta golga assistentlik qilgan Messi bir qator rekordlarni o‘rnatdi yoki takrorladi. Lionelning yangi natijalari bilan tanishtirib o‘tamiz.
— Messining La ligadagi gollari soni 268taga etdi. Bu orqali 27 yoshli argentinalik o‘yinchi futbol tarixida Evropaning kuchli beshlik chempionatlarida urgan gollari soni bo‘yicha germaniyalik Klaus Fisherga etib oldi va kuchli o‘nlikka kirishga muvaffaq bo‘ldi. "Kuchli beshlik"dagi rekord Jimmi Grivzga tegishli — 366ta gol (Angliyada — 357, Italiyada — 9). Gerd Myuller rekordchidan bitta to‘pga ortda qolmoqda. U Bundesligida 365ta gol urgan. Faoliyatini davom ettirayotgan Krishtianu Ronaldu 289ta gol bilan 6-o‘rinni egallab turibdi. U APLda 84ta, Ispaniya chempionatida esa 205ta golga mualliflik qilgan.
— Messining La ligadagi xet-triklari soni 23taga etdi va “Real” hujumchisi Krishtianu Ronalduning rekordini takrorladi. 22tadan xet-trikka Alfredo Di Stefano va Telmo Sarra erishishgan.
— Messi ispan klubi tarkibida barcha turnirlarda xet-trik qilish bo‘yicha Telmo Sarraning rekordini takrorladi. Endi Messining “Barselona” tarkibida kiritgan umumiy xet-triklari soni 31taga etdi.
— "Levante" bilan o‘yinda Neymarga assistentlik qilgan Messi La liga rekordini o‘rnatdi. Ushbu o‘yindan oldin argentinalik futbolchi assistentlik bo‘yicha Luish Figu bilan birga peshqadamlikni bo‘lishib turgandi (107ta).
— Ushbu mavsumda urilgan barcha gollar bo‘yicha Messi Ronaldudan o‘tib ketdi. "Barsa" futbolchisining gollari soni 37taga etgan bo‘lsa, Krishtianuda 36ta gol bor.
— La ligada "gol+pas" tizimi bo‘yicha ham Messi "Real" hujumchisini ortda qoldirdi. Endi Lionel — 39 (26+13), Ronaldu — 38 (28+10) ko‘rsatkichga ega.
— "Levante"ga qarshi o‘yin Lionel uchun La ligadagi 300-o‘yin bo‘ldi.
— Shuningdek, 2008 yil iyun oyidan (klubni Xosep Gvardiola boshqaruviga olgan vaqtdan) hisoblanganda Messi barcha turnirlarda “Barselona”ning 348ta rasmiy uchrashuvida 348ta gol urdi (har 83 daqiqada 1ta gol). O‘sha davrga qadar Leo 110ta o‘yinda 42ta gol urgan (har 176 daqiqada bitta gol).
— Nihoyat, Messining "Barselona"dagi samarali harakatlari (gol+pas) soni 500tadan oshdi — 503 ochko.
Manba: www.stadion.uz.