Foto: Getty Images«Shanxay SIPG»ning braziliyalik legionerlari Halk va Oskar Xitoy chegarasi yopilishiga 11 daqiqa qolganida mamlakatga kirishga ulgurgan, deya xabar qilmoqda Championat.asia.
Xitoy hukumati 26 martdan 27 martga o‘tar kechasi chet elliklar uchun chegarani yopgandi. Ma’lum bo‘lishicha, braziliyalik futbolchilar 26 mart kuni 23:49 nazorat punktiga yetib kelishga ulgurgan. Har ikki futbolchi 14 kunlik karantinga yuborilgan.
«Shanxay SIPG»da faoliyat yurituvchi o‘zbekistonlik futbolchi Odil Ahmedov chegara yopilishidan bir necha kun avval Xitoyga yetib borgan. «Chanchun Yatay» bosh murabbiyi Samvel Babayan esa 23 mart kuni O‘zbekistonda barcha reyslar to‘xtatilishidan avval Xitoy sari yo‘l olgan.
Ma’lum bo‘lishicha, Xitoy chempionatida to‘p suruvchi bir qator legioner futbolchilar belgilangan vaqtga yetib kela olmagan. Mamlakatda milliy chempionat bahslari may oyida start oladi.