O‘zbekistonlik FIFA referisi Ravshan Ermatov 27 yanvar kuni 33000 tomoshabinga mo‘ljallangan Nyukasldagi «Newcastle Stadium» stadionida bo‘lib o‘tadigan Avstraliya-BAA terma jamoalari o‘rtasidagi yarim final o‘yinni boshqarib boradigan bo‘ldi.
Eslatib o‘taman, bungacha Ravshan Ermatov Osiyo kubogining ochilish o‘yinini — “A” guruhi vakillari bo‘lgan Avstraliya-Kuvayt (hisob: 4-1, 2ta sariq kartochka ko‘rsatgan), "S" guruhidan o‘rin olgan Qatar-Eron (hisob: 0-1, 2ta sariq kartochka ko‘rsatgan) 2-tur o‘yinini va "D" guruhidagi Yaponiya va Iordaniya (hisob: 2-0, 4ta sariq kartochka ko‘rsatgan) terma jamoalari o‘rtasidagi hal qiluvchi 3-tur o‘yinni boshqarib borgandi.
O‘zbekistonlik muxlislarining nigohi yana bir bora Avstraliya tomonlarga, aniqrog‘i Nyukasl shahriga qaratilgan bo‘lsa ajab emas. Chunki, hamyurtimiz yarim final uchrashuvni aynan ushbu stadionda o‘tkazadi.
Rasmiy nomi: Nyukasl, Yangi Janubiy Uels.
Stadion nomi: «Newcastle Stadium».
Sig‘imi: 33000.
Ochilgan yili: 1970 yil 10 aprel.
Ushbu stadionda ikkita guruh bosqich o‘yini bo‘lib o‘tdi.
1-tur, 12 yanvar, 2015. “D” guruhi Yaponiya - Falastin (4-0)
3-tur, 17 yanvar, 2015. “A” guruhi Ummon - Kuvayt (1-0)
30 yanvar kungi 3-o‘rin uchun uchrashuvi ham ushbu stadionda bo‘lib o‘tishini ta’kidlab o‘tish joiz.
Shuningdek, Ravshan Ermatov Osiyo kubogi final bosqichida sakkizta uchrashuvini o‘tkazishi bilan boshqa hakamlardan ajralib turibdi. Seshanba kungi o‘yin hamyurtimiz uchun qit’a chemponatlaridagi 9-o‘yin bo‘ladi.
2004 yil. Xitoy. BAA-J.Koreya (23 iyul).
2011 yil. Qatar. Iroq-Eron (11 yanvar), S.Arabistoni-Yaponiya (17 yanvar) — guruh o‘yinlari, Eron-J.Koreya (chorak final, 22 yanvar), Yaponiya-Avstraliya (final, 29 yanvar).
Hamyurtimizga muxlislik qilishni davom etamiz va Osiyo kubogi-2015 finalini boshqarishni ham tilab qolamiz.
P/S. Musobaqa tashkilotchilari Avstraliya terma jamoasini «A» guruhida faqat 1-o‘rinni egallaydi, deya haddan tashqari o‘zlariga ishonishganmi, u yog‘ini bilmadim-u, lekin ular guruhda 2-o‘rinni olib, mana shu kichik stadionda mezbon jamoa – Avstraliyaning yarim finalda o‘ynashini xayoligayam keltirmagani, qiziq holat. Bu esa musobaqa tashkilotchilari uchun katta muammoga aylangani bor gap. Sababini esa barchangiz bilsangiz kerak, albatta.
Abdumajid Qodirov tayyorladi.
Manba: www.stadion.uz.