Supeliganing 2-turidan o‘rin olgan "Nasaf" - "Andijon" (2:1) uchrashuvidan keyin mehmonlar bosh murabbiyi Aleksandr Xomyakov o‘z fikrlarini bildirdi."Butun o‘yin davomida faqat himoyalandik. To‘g‘ri "Nasaf"ning xatosidan keyin gol ura oldik. Ammo umuman olganda rejalashtirgan hech nima o‘xshamadi. Ha, ba’zi vaziyatlarda tartibli himoyalandik, ba’zida omadimiz keldi. Faqat himoyada o‘ynab g‘alaba qozonish qiyin. "Nasaf" haqli tarzda g‘alabaga erishdi", - deydi Aleksandr Xomyakov.
- Jamoaga nima yetishmadi?
- Biz deyarli hujum qilmadik. To‘p bizda bo‘lganida hujumga o‘tishda juda ham sekin o‘ynadik. Qarshi hujum haqida umuman gapirmayapman. Rejamiz maydon markazida himoyaviy o‘ynash edi, afsuski "Nasaf" bizni to‘liq himoyalanishga majbur qildi va to‘liq o‘yin davomida tashabbusga ega bo‘ldi.
- Legionerlar haqida nima deya olasiz?
- Umuman olganda futbolchilarimga u qadar ham e’tiroz yo‘q. Ishlashda davom etamiz va "Navbahor"ga qarshi uydagi o‘yinga tayyorgarlikni boshlaymiz.