Sport tadqiqotlari xalqaro markazi (CIES) Evropaning «kuchli beshlik» chempionatlarida to‘p surayotgan futbolchilarning transfer narxlarini ma’lum qildi, deb xabar bermoqda Kun.uz.Ushbu ro‘yxatda eng qimmat futbolchi sifatida Lionel Messi qayd etilgan – uning narxi 220 million evroga baholangan. Ikkinchi o‘rindagi Krishtianu Ronalduning transfer qiymati tadqiqot markazi tomonidan 133 million evro qilib belgilangan. “Chelsi” yarim himoyachisi Eden Azar esa 99 million evrolik futbolchi sifatida ko‘rilgan.
Shuningdek, “qimmatbaholar” o‘ntaligidan quyidagi futbolchilar o‘rin olgan: Diega Kosta (“Chelsi”, 84 million evro), Pol Pogba (“Yuventus”, 72 million evro), Serxio Aguero (“Manchester Siti”, 65 million evro), Raxim Sterling (“Liverpul”, 63 million evro), Sesk Fabregas (“Chelsi”, 62 million evro), Aleksis Sanches (“Arsenal”, 61 million evro), Garet Beyl (“Real”, 60 million evro).
Futbolchilarning qiymati bir qancha omillar asosida belgilangan. Jumladan, 2009 yildan buyon futbolchilar o‘tkazgan o‘yin, urgan gollar, klublari va terma jamoalari qayd etgan natijalar o‘rganib chiqilgach va ularning transfer qiymati chiqarilgan.
Messi bu borada etakchi bo‘lishiga u o‘tgan yillar davomida qo‘lga kiritgan ko‘pdan-ko‘p yutuqlar, xususan 4 marta “Oltin to‘p” mukofotini qo‘lga kiritishi (2009, 2010, 2011, 2012) asos bo‘lgan.
foto: kun