Bugun "Bunyodkor" jamoasi Minskdagi o‘quv-yig‘in mashg‘ulotlarini to‘qqizinchi kunini o‘tkazmoqda.Xabar berganimizdek, yig‘inning so‘nggi uch kunida uchta nazorat uchrashuvi o‘tkaziladi. Bugun tushga qadar rejalashtirilgan uch o‘yining birinchisi bo‘lib o‘tdi. Belorus futbolining eng yetakchi klubi – BATE o‘rinbosarlariga qarshi bahs «Bunyodkor»ning ustunligida o‘tdi. Ayniqsa, bellashuvning birinchi bo‘limida hamyurtlarimiz mezbonlardan har tomonlama ustunlik qilishdi. Biroq tanaffusga qadar maydon egalari darvozasi faqatgina bir marta ishg‘ol qilindi.
Ikkinchi bo‘lim avvalida bosh murabbiy Vadim Abramov maydonga bir yo‘la 10 nafar yangi o‘yinchini tushirdi. Mezbonlar ustozi birgina o‘zgarish bilan kifoyalandi. Bu o‘zgarishlar "Bunyodkor" jamoasining o‘yiniga salbiy ta’sir qildi. Raqibning ketma-ket uyushtirgan hujumlari 61-daqiqaga kelib o‘z samarasini berdi. Himoyadagi pala-partishlikdan so‘ng Dmitriy Bessmertniy hisobni tenglashtirdi. Ammo BATE yoshlarining xursandchiligi uzoqqa cho‘zilmadi.
O‘tkazib yuborilgan goldan ruhan «sinmagan» "qaldirg‘ochlar" ikki daqiqani ichida vaziyatni o‘z tomonlariga og‘dirishdi. Maydon egalari darvozasiga penalti belgilandi, nuqtaga yaqinlashgan Mirjahon Mirahmadov yana «Bunyodkor»ni hisobda oldinga olib chiqdi. Goldan ruhlangan futbolchilar uchrashuvning qolgan daqiqalarida o‘yin nazoratini o‘z qo‘liga oldi va o‘yin yakuniga Vyacheslav Dergachev darvozasi yana ikki marta ishg‘ol qilindi va toshkentliklar 1:4 hisobida g‘alaba qozonishdi.
Bugungi uchrashuvda «Bunyodkor» safida rossiyalik futbolchi maydonga tushdi. Dmitriy Ostrovskiy Minsk yig‘inida ko‘rikda bo‘ladi. Qolaversa, BATE o‘rinbosarlari darvozasiga birinchi golni urgan Muhammad Dialloning taqdiriga ham Minsk yig‘inidan so‘ng oydinlik kiritiladi.
Eslatamiz o‘tamiz, ertaga jamoa Toshkent vaqti bilan 17:00da Belorus chempionati oliy ligasi vakili «Dnyapro-MChZ»ga qarshi nazorat uchrashuvida maydonga tushadi.
NAZORAT UChRAShUVI
18 iyul. Minsk. «Minsk» FK maydoni
BATE (o‘rinbosarlar) – «BUNYoDKOR» - 1:4 (0:1)
Gollar: Muhammad Diallo, 11 - 0:1. Dmitriy Bessmertniy, 61 - 1:1. Mirjahon Mirahmadov, 63-penaltidan - 1:2. Boburbek Farhodov, 75 - 1:3. Mirjahon Mirahmadov, 81 - 1:4.
BATE: Vyacheslav Dergachev (Roman Tixomirov, 68), Dmitriy Bessmertniy (Danilo Laptin, 76), Nikita Supranovich (Vadim Martinkevich, 81), Maksim Myakish (Yegor Osipov, 81), Pavel Pashevich, Vladislav Rusenchik (Roman Lisovskiy, 69), Aleksandr Nemirko (Maksim Gayevoy, 71), Yevgeniy Guletskiy (Aleksey Shalashnikov, 62), Andrey Potapenko (Ivan Kaloshkin, 71), Dmitriy Matyash, Anton Abramovich (Vadim Pigas, 46).
«Bunyodkor»: Murodjon Zuhurov, Sanjar Qodirqulov, Anvar G‘ofurov, Abdulla Abdullayev, Ulug‘bek Abdullayev, Lutfulla To‘rayev, Sanjar Rixsiboyev, Nurillo To‘xtasinov, Dilshod Ahmadaliyev, Xurshid G‘iyosov, Muhammad Diallo.
Zaxiradan tushganlar: Abdumavlon Abdujalilov, Eldor Adhamov, Boburbek Farhodov, Islomjon Qobilov, Ulug‘bek Abdullayev, Dmitriy Ostrovskiy, Muhammadodil Qahramonov, Javohir Qahramonov, Jasurbek Jaloliddinov, Vladislav Nuriyev, Valeriy Akopov, Mirjahon Mirahmadov, Farrux Ikromov.