"Paxtakor" - "Navbahor" (0:0) uchrashuvidan so‘ng mezbonlar yordamchi murabbiyi Jasur Abduraimov matbuot anjumanida ishtirok etdi."Yaxshi o‘yin bo‘ldi. Ikkala tomondan kurashlarga boy bahs bo‘ldi. "Paxtakor" tomonidan hujumkor o‘yin, "Navbahor" tomonidan qarshi hujumlarga tayanilgan o‘yin ko‘rdik. Mehmonlarga bir ochko bilan tabriklayman. Halol futbol bo‘ldi, kimning omadi kelsa o‘sha yutadi. Mana shunday o‘yinlar ko‘p bo‘lishini istayman", - deydi Jasur Abduraimov.
- Shota Arveladze kelganiga bir yildan oshdi. Hech qanday natija kuzatilgani yo‘q. Qachon jamoa chempionlik yoki kubokni yutadi?
- Barcha narsaga vaqt kerak. Hech qaysi sehrgar kelib bir yilda barchasini qilmaydi. Biz oxirigacha chempion bo‘lish uchun kurashamiz. Men klubda 15 yildan buyon ishlab kelayapman. Hozir klubdagi barcha-barcha natija bo‘lishi uchun harakat qilishmoqda, ammo bu futbol. Qayerda natija bo‘ladi, qayerdadir yo‘q.
- Kubok finalida yutqazildi, chempionlik ham deyarli qo‘ldan ketdi. 2019 yilda ham mana shu qoloq futbolchilar bilan o‘ynaysizlarmi?
- Keyingi yil bir qancha yaxshi futbolchilar olib kelish rejalashtirilmoqda. Ular orasida sobiq "paxtakorchilar" ham bor. 3-4ta pozitsiya kuchaytiriladi. Bir narsani tushuning, qaysidir futbolchi boshqa klubda yetakchi bo‘lishi mumkin ammo "Paxtakor"da bunday bo‘lmasligi mumkin. "Paxtakor"ga kelgan futbolchida chempionlik ruhi paydo bo‘lishi uchun vaqt kerak.
- Bir yarim yil shundayligicha o‘tib ketdi...
- Nega endi? "Paxtakor" halol futbol o‘ynamoqda. Finalni qarang, agar biz AGMKni mag‘lub etganimizda "Paxtakor" sotib oldi deyishardi to‘g‘rimi? Biz halol o‘ynadik. Halol futbolda yutish va yutqazish mumkin. Murabbiylar yoki futbolchilaga halol bo‘lmagan o‘yin orqali yutish rohat bag‘ishlaydi deb o‘ylaysizmi? Negadir jurnalistlar shunday narsalarni yozishmaydi. Mana halol futbol bo‘ldi shuni yozinglar. Yoki bugun "Paxtakor" safida olimpiya terma jamoasiga nomzod ikki futbolchi o‘ynadi - Jahongir Ahmadov va Jasur Yaxshiboyev. Shularni yozinglar. To‘g‘ri tanqid ham kerak, ammo yaxshi narsalarni ko‘proq yozish kerak deb o‘ylayman.
Manba: championat.asia