Osiyo oʻyinlarida kurash jamoasi Oʻzbekiston hisobiga yana bir oltin medal olib berdi.Ayollar oʻrtasida -52 kg vazn toifasida turnirga kelgan Gulnora Sulaymonova finalda hindistonlik Pinski Balharaga qarshi gilamga chiqdi.
U raqib ustidan 10:0 hisobida gʻalaba qozondi va oltin medalga ega chiqdi.
Gulnora Sulaymonova finalgacha indoneziyalik Maya Sari Sembiring, qozogʻistonlik Akjoʻl Kayipxan va moʻgʻulistonlik Gerelma Erdenetsogtni magʻlubiyatga uchratgandi.
Uning finaldagi oltin medali Oʻzbekiston jamoasining toʻqqizinchi oltin medaliga aylandi. Bungacha kurash jamoasidan -66 kg vazn toifasida Maʼruf Gʻaybulloyev hamda +90 kg vazn toifasida Muhsin Hisomiddinov oltin medal olgandi.
-66 kg vazn toifasida finalda Gʻaybulloyevga qarshi kurashgan Ruslan Boʻriyev kumush medal bilan kifoyalandi. +90 kg vazn toifasida yarim finalda eronlik raqibiga yutqazgan Nurbek Toʻrayev hamda -52 vazn toifasida yarim finalda hindistonlik Pinski Balharaga magʻlub boʻlgan Oysuluv Abdumajidova esa bronza medallar bilan kifoyalanishdi.
Endilikda Oʻzbekiston delegatsiyasi Osiyo oʻyinlarida umumiy reytingda 38 medal bilan (9-15-14) Tailandni (9-10-33) ham quvib oʻtib, toʻqqizinchi oʻringa joylashdi.