AQShning Xyuston shahrida og‘ir atletika bo‘yicha kattalar o‘rtasida o‘tkazilayotgan jahon chempionatida to‘rtta vazn toifasida g‘olib va sovrindorlar nomi ma’lum bo‘ldi. Bu haqda O‘zbekiston Milliy olimpiya qo‘mitasi matbuot xizmati xabar bermoqda.
Jumladan, erkaklar o‘rtasida vazni 56 kilogrammgacha bo‘lgan sportchilar musobaqasida barcha sovrinli o‘rinlar Osiyo vakillariga nasib etdi. KXDR vakili Om Yun Chol umumiy 302 kg natija (dast ko‘tarishda — 131 kg, siltab ko‘tarishda — 171 kg) bilan birinchi o‘rinni egallagan bo‘lsa, xitoylik sportchi ikkinchi, Vetnam terma jamoasi a’zosi esa uchinchi bo‘ldi.
O‘zbekistonlik Adhamjon Ergashev ishtirok etgan vazni 62 kilogrammgacha bo‘lgan polvonlar musobaqasida xitoylik Chen Lijun dast ko‘tarishda 150 kg, siltab ko‘tarishda esa 183 kg toshni o‘ziga bo‘ysindirdi va ikkikurash yakunlariga ko‘ra 333 kg natija bilan birinchi o‘rinni egalladi.
Dast ko‘tarishda 122 kg, siltab ko‘tarishda esa 156 kg toshni o‘ziga bo‘ysundira olgan Adhamjon Ergashev umumiy 278 kg ko‘rsatkich bilan 22-o‘rinni egalladi.
Xotin-qizlar musobaqasida ham ikki vazn toifasida g‘olib va sovrindorlar nomi ma’lum bo‘ldi. O‘zbekistonlik Marina Sisoyeva hamda Lola Qodirova vazni 53 kilogrammgacha bo‘lgan sportchilar bahsida ishtirok etgan. G‘oliblikni Xitoy Taypeyi vakilasi dast ko‘tarishda 96 kg, siltab ko‘tarishda esa 125 kg toshni o‘ziga bo‘ysundirib, ikkikurash yakuniga ko‘ra 221 kg natijani qayd etdi.
Marina Sisoyeva dast ko‘tarishda 88 kg, siltab ko‘tarishda esa 112 kg natija qayd etib, ikkikurash yakuniga ko‘ra 200 kg ko‘rsatkich bilan 7-o‘rinni egalladi. Ushbu vazn toifasining «B» guruhida ishtirok etgan Lola Qodirova umumiy 183 kg natija (84 kg – 99 kg) bilan 21-o‘rinni band etdi.
Xotin-qizlar o‘rtasida 48 kg vazn toifasida bo‘lib o‘tgan musobaqalarda xitoylik sportchi g‘alaba qozondi. Jahon chempionati bahslari davom etmoqda.
Manba: Daryo.uz