Chechenistonlik 6 nafar olimpiyachi Mercedes rusumidagi avtomobillar bilan taqdirlandi. Bu haqda Checheniston rahbari Ramzon Qodirov instagramda ma’lum qildi, deyiladi "Kun" nashrida. Mashinalar bilan Olimpiadada ishtirok etgan bokschi Adlan Abdurashidov, erkin va klassik uslub kurashchilari Islombek Albiev, Anzor Boltukaev, Islom Magomedov taqdirlandi. Shtangachilar Apti Auxadov va Adam Maligov Olimpiadaga qo‘yilmagan bo‘lsalarda, ularga ham mashinalar taqdim qilindi.
Sportchilarni taqdirlash marosimi Grozniyda 3 sentyabrda bo‘lib o‘tdi. Ramzon Qodirov sportchilarga tirishqoqliklari va bor kuchlarini ayamaganlari uchun minnatdorchilik bildirdi va sportchilarning asosiy g‘alabalari hali oldinda ekaniga umid bildirib qoldi.
"Tantanalarda yurtdoshimiz Albert Saritov mehmon bo‘ldi. U Ruminiya terma jamoasi safida ishtirok etib, erkin kurash musobaqalarida bronza medali sohibi bo‘ldi. Rossiya qahramoni Ahmad-Xoji Qodirov nomidagi Mintaqaviy jamoatchilik jamg‘armasi prezidenti Aymani Nesievna Qodirovaning qarori bilan 6 nafar sportchiga Mercedes jiplari berildi", deb ma’lum qildi Ramzon Qodirov.