Bugun Rio-Olimpiadasining boks bo‘yicha musobaqachida birinchi final bahsi o‘tkazildi. 14 avgust O‘zbekiston sporti tarixiga kiradigan kun bo‘ldi.49 kilogrammgacha bo‘lgan sportchilar o‘rtasidagi turnirda o‘zbekistonlik Hasanboy Do‘stmatov Kolumbiya vakili Yuberxen Martines Rivasga qarshi ringga chiqdi.
Jang o‘zbekistonlik bokschining to‘liq ustunligida o‘tdi va hakamlar yakunda Hasanboy Do‘stmatovga g‘alaba berishdi. Yakuniy baho - 3:0 — 29:28, 30:27, 30:27.
Bu esa O‘zbekiston delegasiyasiga Rio-2016 olimpiadasidagi ilk oltin medalni olib keldi.
Do‘stmatov o‘zi orzu qilgani kabi Muhammadqodir Abdullaevning natijasini takrorladi. 2000 yildan buyon ilk marta O‘zbekiston boks terma jamoasi oltin medalga ega bo‘ldi. Olimpiadalarda boks bo‘yicha birinchi va oxirgi oltin medalni o‘zbekistonlik sportchi 16 yil avval — Sidney Olimpiadasida olgandi. O‘shanda Andijon sport maktabi vakili Muhammadqodir Abdullaevdan O‘zbekistonga oltin medal olib qaytgandi.
Hasanboy Do‘stmatov hal qiluvchi finalga qadar 3 nafar raqibining har birini uchta raund natijasiga ko‘ra mag‘lub etishga muvaffaq bo‘lgandi. Bular: meksikalik Xoselito Velaskes, qozog‘istonlik Birjan Jakipov va amerikalik Niko Ernandes.
Manba:Kun.uz