“UzReport TV” telekanalidan yana bir syurpriz! Ko‘p sonli futbol muxlislarining talab va istaklarini inobatga olgan holda, 18 may kuni bo‘lib o‘tadigan Evropa Ligasi finali ham eksklyuziv tarzda telekanalimiz orqali to‘g‘ridan-to‘g‘ri efirga uzatiladi.
Shu kuni Shveysariyaning Bazel shahrida Angliyaning “Liverpul” va Ispaniyaning “Sevilya” klublari o‘zaro kuch sinashadi. O‘yin Toshkent vaqti bilan soat 23:45da boshlanadi.
“UzReport TV” telekanali mazkur o‘yinga bag‘ishlangan translyasiyani soat 21:45dan boshlaydi. Evropa Ligasi finalidan avval bo‘lib o‘tadigan barcha rasmiy marosim va tadbirlar muxlislar e’tiboriga jonli efirda havola qilinadi.
Ushbu final uchrashuvi “UzReport TV” telekanalida Evropa Ligasi o‘yinlari translyasiyasini boshlab beradi. 2016/17 yilgi mavsumdan boshlab Evropa Chempionlar Ligasi bilan bir qatorda, Evropa Ligasi uchrashuvlari ham telekanalimiz orqali to‘g‘ridan-to‘g‘ri efirga uzatiladi.
“UzReport TV” telekanalida syurprizlar mavsumi davom etadi!..