Mo‘g‘iliston poytaxtida o‘tayotgan sport kurashlari bo‘yicha Rio Olimpiadasiga yo‘llanma beruvchi kvalifikasion musobaqa davom etmoqda. Ayni damda uchinchi kun doirasida erkin kurashchilar bahs olib borishmoqda. Bu haqda "Sports.uz" xabar bermoqda.Biroz avval -97 kilogramm vazn toifasida ishtirok etayotgan Magomed Ibragimov Rio Olimpiadasi yo‘llanmasini naqd qildi. Dastlab koreyalik Jaegang Kim, keyin esa yaponiyalik Takeshe Yamaguchi dog‘da qoldirildi. Yarim finalda vakilimizga mo‘g‘ilistonlik Xuderbulga Dorjxand raqiblik qildi. Bu polvon ham yengilgach, Magomed final bilan birga Olimpiada yo‘llanmasini ham naqd qildi. Ibragimov oltin medal uchun armanistonlik Georgi Ketoyevga qarshi bahs olib boradi.
-86 kilogramm vaznda bellashayotgan Umidjon Ismanov yarim finalgacha mardonavor etib keldi. Afsuski, final uchun kechgan bahsda amerikalik Maykl Koxga, bronza medali uchun kechgan bellashuvda esa polshalik Zbigniev Baranovskiga mag‘lub bo‘ldi. Vakillarimizdan Hasanboy Rahimov va Nodirjon Safarov medallar uchun kurashdan erta chiqib ketishdi.