O‘zbekiston Sog‘liqni saqlash vazirligi onkologik xizmat uchun 20 dona radioterapevtik qurilmani sotib olishni boshladi.Hozirgi kunda mamlakatimizda onkologik xizmatni rivojlantirish dasturi amalga oshirilayotgan bo‘lib, bu dasturda yurtimizdagi tibbiyot muassasalarini zamonaviy asbob-uskunalar bilan jihozlash ko‘zda tutilgan.
Respublika onkologiya ilmiy markazi va viloyatlardagi onkologik dispanserlar uchun radioterapevtik asbob-uskunalarni xarid qilish Sog‘liqni saqlash vazirligi va Islom rivojlanish banki tomonidan amalga oshirilayotgan “O‘zbekiston Respublikasi onkologiya muassasalarini modernizasiyalash” loyihasi doirasida amalga oshirilmoqda.
Xarid qilinayotgan radioterapevtik asbob-uskunalar orasida turli maqsadlarda qo‘llanuvchi qurilmalar mavjud. Misol uchun, chiziqli tezlashtirgich saraton o‘smalarini 3D formatda ko‘rish hamda ularni qo‘shni to‘qimalarni zararlantirmagan holda nurlantirish imkonini beradi. Shuningdek, sotib olingan asbob-uskunalar ro‘yxatida o‘smalarni masofadan turib nurlantirish uchun mo‘ljallangan 11 ta gamma-terapevtik qurilma hamda 7 ta tananing ichki bo‘shlig‘i gamma-terapiyasi uchun mo‘ljallangan qurilma mavjud.
Bu qurilmalarning yurtimizga etkazilishiga qadar Sog‘liqni saqlash vazirligi ular uchun xonalarni tayyorlash ishlarini tugatishni rejalashtirilmoqda. Ayni kunda onkologik dispanserlarni ta’mirlash va rekonstruksiya qilish hamda Respublika onkologiya ilmiy markazida radioterapevtik korpusning qurilish ishlari nihoyasiga etkazilmoqda.
Manba: www.kun.uz