Toshkent viloyati Chinoz tumani «Chinmasjid» mahallasida 5 may kuni qotillik jinoyati sodir etilgan. Bu haqda Bosh prokuratura matbuot xizmati «Daryo»ga ma’lum qildi.Ma’lum bo‘lishicha, 1975 yilda tug‘ilgan F.M. soat 17:00 larda mast holda tanishi, 1982 yilda tug‘ilgan A.E. bilan janjallashib, bolta bilan uning boshiga bir necha bor urib, o‘ldirgan.
«U 6 may kuni soat 10:30 larda A.E.ning murdasini Sirdaryo daryosiga tashlab yuborgan», — deyiladi Bosh prokuratura axborotida.
Marhumning murdasi 14 may kuni Qozog‘istonning Turkiston viloyati Keles tumanidan oqib o‘tuvchi Sirdaryo daryosi qirg‘og‘idan topilgan.
Mazkur holat yuzasidan 18 may kuni Chinoz tumani prokuraturasi tomonidan F.M.ga nisbatan Jinoyat kodeksining 97-moddasi 1-qismi (qasddan odam o‘ldirish) bilan jinoyat ishi qo‘zg‘atilgan, u ushlangan.