Hukumat tomonidan Adliya vazirligi huzuridagi Davlat xizmatlari agentligi faoliyatini tashkil etish chora-tadbirlari haqida qaror qabul qilindi, deya Adliya vazirligining "Huquqiy axborot" kanalida (@huquqiyaxborot) ma’lum qilindi.Qaror bilan:
Adliya vazirligi huzuridagi Davlat xizmatlari agentligi to‘g‘risida nizom;
“yagona darcha” tamoyili bo‘yicha faqat Davlat xizmatlari markazlari tomonidan ko‘rsatiladigan davlat xizmatlari ro‘yxatini amalga oshirishga doir-chora tadbirlar tasdiqlandi.
Qarorda belgilanishicha Agentlik davlat va xo‘jalik boshqaruvi organlaridan mustaqil va Adliya vazirligiga hisobot beradi.
Shuningdek 2018–2020 yillarda 58 ta davlat xizmatini ko‘rsatish bosqichma-bosqich faqat Davlat xizmatlari markazlari tomonidan amalga oshiriladi.
Jumladan, 2018 yilning o‘zidayoq jami 26 ta davlat xizmatidan Davlat xizmatlari markazlari orqali foydalanish imkoniyati yaratiladi. Xususan tug‘ilganlikni qayd etish, adliya organlaridan chiqadigan hujjatlarga apostil qo‘yish, FHDYo va notariat organlari tomonidan arxiv hujjatlarini berish, sudlanganlik haqida ma’lumot berish va h.k.
Nostrifikatsiya, xorijda mehnat qilishga ruxsatnoma,ta’lim to‘g‘risida hujjat dublikatini berish kabi 10 ta davlat xizmatidan 2019 yilda, nikohni qayd etish, otalikni belgilash, farzandlikka olish, pensiya tayinlash, transport vositlarini ro‘yxatdan o‘tkazish kabi 22 ta davlat xizmati turidan 2020 yildan boshlab Davlat xizmatlari markazlari orqali foydalanish mumkin bo‘ladi.