O‘zbekiston Respublikasi Prezidenti Islom Karimov 5 dekabr kuni Oqsaroyda bir guruh fuqarolarga O‘zbekistonning yuksak mukofotlarini topshirdi. Bu haqda O‘zbekiston Milliy axborot agentligi'ga asoslanib «Daryo» nashri
xabar bermoqda.
Davlat rahbarining farmonlariga muvofiq O‘zbekiston Respublikasi mustaqilligining 23 yilligi arafasida O‘zbekiston iqtisodiy salohiyatini yuksaltirish va islohotlarni muvaffaqiyatli amalga oshirishga katta hissa qo‘shgan, el-yurt tinchligi va osoyishtaligini yanada mustahkamlashda fidoyilik ko‘rsatgan, jamiyatning ijtimoiy-iqtisodiy, ilmiy-texnik va ma’naviy-ma’rifiy hayotida alohida e’tiborga sazovor bo‘lgan bir guruh fuqarolar davlat mukofotlari — faxriy unvonlar, orden va medallar bilan taqdirlangan edi.
Oqsaroyda 5 dekabr kuni ana shu yuksak mukofotlarni tantanali topshirish marosimi bo‘ldi.
«Avvalambor, siz, azizlar bilan bugun mana shunday yaxshi kayfiyatda shu muhtasham zalda ko‘rishganimdan, sizlarga o‘zimning yuksak hurmat-ehtiromimni izhor etishdan xursandman, — dedi Islom Karimov. — Sizlarga ma’lumki, odatga aylanib qolgan an’anaga ko‘ra, har yili Konstitusiya kuni arafasida Vatanimizning yuksak unvon, orden va medallariga sazovor bo‘lgan yurtdoshlarimiz bilan uchrashib, ularni shu buyuk sana bilan tabriklash, ana shu mukofotlarni topshirishni o‘zim uchun haqiqatan ham katta sharaf, deb bilaman.
Shu bilan birga, siz, azizlar qatori davlat mukofotlari bilan taqdirlangan barcha vatandoshlarimni g‘oyibona bo‘lsa ham bag‘rimga bosib, muborakbod etish menga chuqur mamnuniyat etkazadi, quvonchimga quvonch bag‘ishlaydi.
Biz jahondagi eng rivojlangan davlatlar qatoriga kirish, xalqimizning hayot darajasi va sifatini oshirish, xalqaro maydonda Vatanimizning obro‘-e’tiborini yuksaltirish kabi oliy maqsadlarni o‘z oldimizga qo‘yganmiz. Ana shu yo‘lda barchamiz bir yoqadan bosh chiqarib, belimizni mahkam bog‘lab, oldimizga qo‘ygan vazifalarni amalga oshirish, marralarni egallashga barcha kuchimizni safarbar qilishga intilmoqdamiz», — dedi Prezident.
So‘ngra Prezidentimiz davlat mukofotlarini tantanali ravishda topshirdi.
«Bugun sizlarning har biringiz uchun haqiqatan ham unutilmas kun, qutlug‘ ayyom, – dedi Islom Karimov. — Vatanimizning sizlarga berilgan nufuzli mukofotlari xalqimiz, davlatimizning barchangizga bildirgan yuksak ishonchidan, oliyjanob mehnatingiz munosib qadr topganidan dalolat beradi.
Vatanimizning yuksak mukofotlariga sazovor bo‘lgan barcha-barcha yurtdoshlarimizga, siz, azizlarga aytadigan tabrik va tilaklarim: bunday yuksak unvon, orden va medallar hammangizga buyursin, yangi yutuq va omadlar, baxt, sog‘lik-salomatlik, fayz-u baraka keltirsin. Yurtimiz, elimiz omon, osmonimiz musaffo bo‘lsin».
Foto: ouzbekistan.fr