Evropa davlatlaridagi bir qator sayyohlik kompaniyalari xabarlariga tayanib, Evropadan O‘zbekistonga kelayotgan sayyohlar soni keskin oshgani ma’lum qilindi. Bu haqida Diydoraziz.uz nashri xabar berdi.“Aksariyat Evropa davlatlari fuqarolari uchun O‘zbekistonga kelish uchun viza bekor qilingandan so‘ng bu yurtga kelishni istovchilar soni 200-300 foizga o‘sdi”,-deydi Pinneaple Tours Avstriya sayyohlik firmasi sotuv bo‘yicha menejeri Valter Xofer. “O‘zbekiston doim Markaziy Osiyo davlatlari orasida dur bo‘lib kelgan, biroq vizalarni olishga oid qog‘ozbozlik va sansolorlik bu yurtga kelishga bo‘lgan xohishni biroz kamaytirardi. Ushbu cheklovlar olib tashlanishi nafaqat sayyohlik firmalari xodimlari, balki oddiy sayyohlar uchun ham haqiqiy sovg‘a bo‘ldi”,-ta’kidlab o‘tdi u.
“2017 yilda O‘zbekistonga tashrif buyurishni niyat qilganlar soni 1,5 barobarga oshdi. Bu ko‘rsatgich hali oxiri emas. Sayyohlik firmalari agentlari so‘ziga qaraganda, yanvar-fevral oylarida yurtingizga kelishni istaganlar soni yanayam oshishi mumkin. Chunki aynan ushbu oylarda safar qilishga xohish bildiruvchilar soni ko‘payadi”,-deydi Albatros Tours nemis sayyohlik kompaniyasi rahbari Yurgen Shnayder. Shuningdek fransuzlarning ham yurtimizga qiziqishlari barcha rekord natijalarni urgan. “Haqiqatdan ham, ko‘p yillar mobaynida O‘zbekistonga tashrif buyurib kelgan fransuzlar uchun vizaning bekor qilinishi zo‘r xursandchilik bilan qabul qilindi,-dedi Fransiyadagi Consult Voyages sayyohlik kompaniyasi rahbari Monki Benayke.