Andijon viloyatining Paxtaobod tumanida fuqarolik holati dalolatnomalarini yozish muassasasi binosining ochilish marosimi bo‘lib o‘tdi. Bu haqda «Daryo» ma’lum qildi. Ushbu maskanda yoshlar nafaqat nikoh guvohnomasiga imzo chekadi, balki nikoholdi suhbatlari, turli ma’naviy-ma’rifiy tadbirlarga jalb etilib, ularga oila mustahkamligi haqida tushunchalar beriladi.
Binoning tantanali ochilish marosimida ishtirok etgan viloyat hokimi Shuhratbek Abdurahmonov tuman aholisini zamonaviy arxitektura uslubida va barcha qulayliklarga ega binoning ishga tushishi bilan qutladi.
Shundan so‘ng tadbirga tashrif buyurgan mehmonlar yangi binoda yaratilgan shart-sharoit va qulayliklar bilan tanishib, uch yosh oilaning nikohdan o‘tish marosimiga guvoh bo‘ldi.