Rossiya Prezidenti Vladimir Putin O‘zbekiston Respublikasi Prezidenti vazifasini vaqtincha bajaruvchi Nig‘matulla Yo‘ldoshevga O‘zbekistonning Birinchi Prezidenti Islom Karimov vafoti munosabati bilan hamdardlik bildirdi. Bu haqda "Kreml" saytida xabar qilinganini "Gazeta.uz" ma’lum qildi.«Uning hayotdan ko‘z yumishi — O‘zbekiston xalqi hamda butun Mustaqil Davlatlar Hamdo‘stligi va Shanxay hamkorlik tashkiloti bo‘yicha sherik davlatlar uchun katta yo‘qotish bo‘ldi. Islom Abdug‘anievich nufuzli davlat arbobi, o‘z mamlakatining chinakam etakchisi edi. Zamonaviy o‘zbek davlatchiligi tarixidagi eng muhim bosqichlar uning nomi bilan bog‘lanadi.
Islom Karimov rahbarligi ostida O‘zbekistonda Markaziy Osiyoda xavfsizlik va barqarorlikni mustahkamlash, mintaqada ko‘ptomonlama hamkorlikni rivojlantirishga xizmat qilgan tinchliksevar tashqi siyosat yuritildi.
Islom Karimovning mamlakatlarimiz o‘rtasidagi strategik sherikchilik va hamkorlik munosabatlarining o‘rnatilishidagi hissasini baholash qiyin. Qardosh xalqlarimiz manfaatlari yo‘lida Rossiya-O‘zbekiston hamkorligini kelgusida ham yanada rivojlantirishimizga ishonchim komil".
Vladimir Putin Islom Karimovning yaqinlari, O‘zbekiston hukumati va butun xalqiga chuqur hamdardligining etkazilishini so‘radi.