Feysbuk foydalanuvchisi Doniyor Ro‘zmetov o‘z sahifasida xorij nashrlarida O‘zbekiston prezidenti Islom Karimovning salomatligi borasida asossiz va yolg‘on xabarlar tarqatilganiga javoban post qoldirdi. U ijtimoiy tarmoqdagi vatandoshlar, axborot tarqatuvchi saytlardan o‘z mulohazalarini qayta nashr etishni so‘ragan. Bu haqda "Kun" xabar bermoqda.Quyida matn o‘zgartirishlarsiz keltirilgan.
Fransiya prezidenti Fransua Olland kechasi Parij ko‘chalari bo‘ylab skuterda sayrga chiqib ketganida, bu Fransiyada bahs va munozaralarga sabab bo‘lgan edi. Insonlar «Prezident yonida o‘zini qo‘riqlash uchun etarlicha qo‘riqchilar bilan birgalikda sayohat qildimi yoki bitta o‘zi sayrga chiqib, o‘z hayotini xavf ostiga qo‘ydimi?» degan savollar bilan o‘z xavotirlarini izhor etishgan edi. Bu kabi bahs va munozaralar Barak Obama va boshqa davlatlardagi prezidentlarning xavfsizligi yuzasidan ham yuz bergan. Chunki davlat rahbari, armiyaning oliy bosh qo‘mondoni va xalqning yo‘lboshchisining hayoti xavf ostida qolishi mumkin emas deb hisoblanadi.
Xuddi shu kabi bahs-munozaralar dunyo mamlakatlari va hukumat rahbarlarining sog‘ligi yuzasidan ham bo‘lib turadi. Bir paytlar Rossiya prezidenti Vladimir Putin bir haftacha televizorda ko‘rinmay qolganida butun dunyoda vahimalar va xavotirlar urchib ketgan edi. Shunday paytda davlatning do‘st va dushmanlarini bilib olish juda oson bo‘ladi.
Bir tomonda do‘st davlatlar xavotirga tushsalar, boshqa tomondan dushman davlatlar (va manfaatdor kuchlar) ko‘rinmay qolgan davlat rahbari haqida har xil mish-mishlarni tarqatib, xalq orasida parokandalik keltirib chiqarishga harakat qiladilar. O‘shanda RF prezidentining ma’muriyati masalaga oydinlik kiritib, “xavotirga o‘rin yo‘qligi”ni aytgan va o‘z xalqini tinchlantirgan edi. Oradan bir-ikki kun o‘tib, davlat etakchisi televidenieda ko‘rinish berishi bilan dunyo sharhlovchilari darrov “Ana, biz haq bo‘lgan ekanmiz”, “uning yuzlari oqargan”, “ovozi xirillagan”, “yursa oqsayapti” va hokazolar deb o‘zlarining o‘ylab topgan mish-mishlariga isbotlar qidirish bilan ovora bo‘lgan edilar. Vaqt ularning nohaq bo‘lganini keyinchalik ko‘rsatgan edi…
…Prezidentlarning salomatliklari mavzusi dolzarb mavzu bo‘lsa, insonlarning axborot olish huquqlari va oshkoralik tamoyillari ham xuddi shunday muhim hisoblanadi. Shu sababdan, demokratik yo‘lni tanlagan davlatlar har xil mish-mishlarning oldini olish va o‘z fuqarolarining fundamental huquqlarini himoya qilish maqsadida xalqqa prezident salomatligi haqidagi xabarlarni o‘zlari oshkora taqdim etadi. Bugun O‘zbekistonda xuddi shunday bo‘ldi.
O‘zbekiston rahbari mustaqillik tantanalari arafasida salomatligini to‘liq ko‘rikdan o‘tkazish va zarur davolanish muolajalarini olish maqsadida shifoxonaga joylashganligi haqida Vazirlar Maxkamasi xabar tarqatdi.
Buning orqasidan kutilganiday manfaatdor taraflar o‘zlaricha har xil taxminlarni taqdim etib, xalqni xavotirga solishga intila boshladi. Lekin ularning niyatlari puchga chiqqanligi bir zumda aniq bo‘lib koldi. Chunki xabar chiqqan ilk onlardanoq ijtimoiy tarmoqlarda barcha insonlar o‘zlarining prezidentimizga xayrixoh ekanliklarini bildirib, unga sog‘lik-salomatlik va uzoq umr tilay boshlashdi.
O‘zbek xalqi ming yillik tarixga ega, boshidan ko‘p kunlarni kechirgan dono xalq. Shu sababdan yurtdoshlarimiz bunday mas’uliyatli damlarda shovqin solish va xavotirga berilish emas, aksincha xotirjamlikni saqlash lozimligini yaxshi biladilar. Menimcha, eng to‘g‘ri yo‘l ham — shu.