A-380 Qarshi-Buxoro trassasining 185-kilometridagi ko‘prik ortiqcha yuklanishlar va eskirib qolgan konstruksiya sababli buzilgani ma’lum qilindi. Bu haqda Respublika yo‘l jamg‘armasi direktori o‘rinbosari Shuhrat Davlatyorov ma’lum qildi, deyiladi "Kun" nashrida.Eslatib o‘tamiz, bir oy oldin ko‘prikning 5 ta ustunidan biri undan yuk mashinasi o‘tayotganda qulagan. Jabrlanganlar haqida ma’lumot berilmagandi.
Davlatyorovning aytishicha, 1965 yilda qurilgan ko‘prikdan foydalanish muddati 30 yilga, o‘q bo‘yicha yuklanishni ko‘tarishi esa 10 tonnani ko‘tarishga mo‘ljallangan bo‘lgan. Eskirib qolgan ko‘prik tashqi yuklanishlarni ko‘tara olmagan.
"Hozirgi kunda yo‘llar jahon standartlari bo‘yicha 50 yillik foydalanishga mo‘ljallab qurilmoqda. O‘zbekistonda o‘q bo‘yicha yuk ko‘tarishi 13 tonna bo‘lgan 341 km yo‘l o‘tkazilgan. Bundan tashqari, Qo‘qon, Toshkent, Bo‘ka, Guliston, Kattaqo‘rg‘on va Buxoroda 228 km aylanma yo‘llar o‘tkazilgan", deb ma’lumot berdi Davlatyorov.
"Buzilgan ko‘prik mahalliy korxonalar kuchi bilan rekonstruksiya qilinadi. Rekonstruksiya ishlari bu yil boshlanadi", deb qo‘shimcha qildi Davlatyorov.
Hozirda ko‘prik avariyaviy holatda deb hisoblanib, undan faqatgina yengil avtomobillar o‘tishiga ruxsat berilgan. Yuk mashinalarining ko‘prikdan o‘tishi cheklab qo‘yilgan, ular boshqa yo‘llardan foydalanishmoqda. Misol uchun, Navoiy orqali o‘tuvchi trassa bor.