Internetda Toshkentning Muqimiy ko‘chasi bo‘yicha o‘tuvchi yangi ko‘prik maketi paydo bo‘ldi

Toshkentda joriy yilning sentyabr oyigacha yangi xalqa yo‘lida barpo etiladigan uchta ko‘prik paydo bo‘ladi. Ijtimoiy tarmoq foydalanuvchilari Shota Rustaveli va Muqimiy ko‘chalari kesishgan joydagi bunday ko‘priklardan birining maketini namoyish qilishdi, deb yozmoqda "Kun.uz" nashri.

Ayni vaqtda Muqimiy ko‘chasida qurilish ishlari davom etmoqda. Bu erda bo‘lajak ko‘prikning poydevori qo‘yilmoqda. Yakuniy bosqichda ko‘prikning bir qismi joylashadigan Sh.Rustaveli ko‘chasidan Bobur ko‘chasigacha davom etuvchi yangi yo‘l quriladi.

Uchinchi halqa yo‘li Toshkentning markaziy qismida paydo bo‘ladi, buning uchun yangi Nurafshon ko‘chasining Beruniy ko‘chasidan Sharof Rashidov ko‘chasigacha qismida yangi yo‘ldan foydalaniladi. Toshkent hokimi Rahmonbek Usmonovning aytishicha, barcha ishlarni 2016 yilning sentyabriga yakunlash mo‘ljallangan. Shuningdek, Bunyodkor shohko‘chasida (Muqimiy ko‘chasi bilan kesishgan joyida) va Oqtepa maydonida ham ko‘prik qurilishlari olib borilmoqda.