25 aprel kuni Buyuk Britaniyaning Toshkentdagi elchixonasi Alisher Navoiy nomidagi milliy kutubxonada «Angliya kuni» deb nomlangan madaniy-ma’rifiy tadbir o‘tkazdi. Bu haqda Buyuk Britaniyaning Toshkentdagi elchixonasi matbuot xizmati ma’lum qildi.Ushbu tadbir Buyuk Britaniyada nishonlanayotgan bir qator muhim sanalarga: 21 aprel Qirolicha Elizaveta II ning 90 yoshligi, 23 aprel – Angliya himoyachisi Avliyo Georgiy kuni hamda Shekspirning tavallud kuni va o‘limining 400 yilligiga bag‘ishlandi.
Tadbirda ishtirokchilarni Buyuk Britaniyaning madaniyati, an’analari va adabiy merosi bilan yaqindan tanishtirish uchun turli musobaqa va savol-javob o‘yinlar uyushtirildi. Ushbu tadbirda 50 dan ortiq talaba ishtirok etib, eng faol ishtirokchilar elchixona sovrinlariga ega bo‘ldi. Tadbirda Milliy kutubxona direktori Asadjon Xo‘jaev, Buyuk Britaniya elchisi Kristofer Allan va elchi o‘rinbosari Fiona Makston so‘zga chiqdi.
Elchi Allan, o‘z navbatida, ingliz tilini o‘rganishga, Britaniyaning madaniyati, an’analari va adabiy merosini o‘rganishga ortib borayotgan qiziqishni mamnunlik bilan ta’kidlab o‘tdi. Bundan tashqari, kelajakda ham Milliy kutubxona bilan hamkorlikda turli madaniy va ma’rifiy tadbirlarni tashkillashtirishga tayyorligini ifodaladi.