Axborot va ommaviy kommunikatsiyalar agentligi direktori Komil Allamjonov O‘zbekiston telekanallari faoliyatining ayrim jihatlarini tanqid qiluvchi post qoldirgan edi.Xususan Allamjonov telekanallarda namoyish etilayotgan turk seriallari ustidan kelib tushayotgan shikoyatlar soni 5 baravar ortganini hamda nodavlat telekanallarda lotoreya orqali sifatsiz mahsulotlarni targ‘ib qilish avj olgani haqida gapirgan edi.
Qisqa vaqt ichida ushbu xabar ostiga yuzlab izohlar va fikrlar paydo bo‘ldi. Ularning aksariyati Allamjonov tanqidini qo‘llab-quvvatlashdi. Quyida ushbu postlardan, bizning fikrimizcha, eng e’tiborga loyiqlarini keltirib o‘tamiz:
“Turk seriallarini atayin kuzatdim va ularda biror marta oilani muqaddas tushuncha ekanligi, oilada er-xotin bir-biriga xiyonat qilish kechirilmas gunoh ekanligini, qurol ko‘tarib yurish jinoyat ekanligini, qiz bolani ibo-hayosi, ota-onasini, aka-ukasining oldida "sevgi o‘yinlarini o‘ynashi" uyat ekanligini targ‘ib etuvchi birorta ham lavha ko‘rmadim! <...> Otadi, chopadi, so‘kadi - hammasi bir-birini xotini bilan yuradi!!! Bu qanaqa ma’naviyat!”, – deb yozgan Diyorbek Rayimjonov.
- Yana bir gap, taraqqiyotga erishgan davlatlar hech qachon serial ko‘rib taraqqiyotga erishmagan! Biz ham iqtisodiy jihatdan oldimizga qo‘ygan maqsadlarimizga erishib olaylik, keyin bemalol, afrikani seriallarini ko‘rib o‘tirsak yarashaveradi – deb qo‘shimcha qilgan ushbu foydalanuvchi.
Feysbuk foydaanuvchilari, shuningdek, O‘zbekiston telekanallaridagi boshlovchilar adabiy o‘zbek tilida gapirmayotganidan ham shikoyat qilishgan.
“Assalomu alaykum! Hurmatli Komil Allamjonov! Hozirgi kunda xususiy telekanallarda boshlovchilar deyarli shevada ko‘rsatuv olib bormoqda. Kinolarda ham shevada so‘zlashadi. Adabiy til me’yorlariga amal qilinishini nazorat qilishingizni istardim”, - deb yozgan Oymomo nikli foydalanuvchi.
Ko‘pchilik ushbu fikrni qo‘llab quvvatlagan. Darhaqiqat, oldingi davrlarda telekanal efiridan faqat sof o‘zbek tilini eshitar edik, hozir bo‘lsa ko‘plab ko‘rsatuvlar boshlovchilari adabiy tilni chetga surib qo‘yib Toshkent shevasida so‘z yuritmoqda.
“Agar TVdagi qimorvoz kanallarni ishlari tartibga solinmasa, odamlar sifatsiz suv va boshka mahsulotlardan zaharlanib ham moddiy ham ma’naviy zarar ko‘rishi mumkin”, - deb yozadi Shuxrat Atamuxamedov.
Haqiqatdan ham odamlar "malibu" yo "spark" berarkan deb gazli suvlarni hadeb ichib yotibdi. Albatta ularning tarkibidagi kimyoviy bo‘yoqlar, shakar sog‘liqqa foyda keltirmaydi. Ushbu mahsulotlar sifatini biror kishi nazorat qilayotgani ham sezilmaydi.
Foydalanuvchilar, shuningdek, faqat turk seriallari emas balkim, boshqa davlatlar seriallarini ham namoyish qilish kerakligini, O‘zbekistonda suratga olinayotgan seriallarning sifati va saviyasini oshirish kerakligini ham ta’kidlashmoqda.