Rossiyaning Moskva shahridagi Kreml saroyida O‘zbekiston madaniyat kunlariga start berildi.Bugun, 12 sentyabr kuni ochilish marosimi o‘tkazilmoqda. Unda O‘zbekiston xalq artistlari Muyassar Razzoqova, Ramiz Usmonov, Munojot Yo‘lchiyeva, Afzal Rafiqov, Mansur Toshmatov, Gulsanam Mamazoitova, Farruh Zokirov va “Yalla” ansambli, O‘zbekistonda xizmat ko‘rsatgan artistlar Jenisbek Piyazov, Sevara Nazarxon, Furqat Ashuraliyev, Elmurod Ahmedov, Yulduz Turdiyeva, To‘lqin Jabborov, Oygul Nodirova, “Zulfiya” mukofoti sovrindori Shirin Mamatova, xalqaro tanlovlar laureati Ulug‘bek Olimov, “O‘zbekiston” va “Navbahor” ashula va raqs jamoalari, O‘zbekiston yosh simfonik orkestri guruhi ishtirok etadi.
O‘zbekiston va Rossiya o‘rtasidagi aloqalar o‘rnatilganligining 25 yilligi munosabati bilan tashkil etilgan madaniy tadbirni O‘zbekiston Respublikasi Madaniyat vaziri Baxtiyor Sayfullayev ochib beradi. Unda O‘zbekiston Respublikasi Madaniyat vaziri o‘rinbosari Kamola Oqilova, Rossiya Federatsiyasi Prezidentining xalqaro madaniy hamkorlik bo‘yicha maxsus vakili Mixail Shvidkoy va Rossiya madaniyat vazirining birinchi o‘rinbosari Vladimir Aristarxov so‘zga chiqadilar.
Rossiyada O‘zbekiston madaniyat kunlari doirasida 13 sentyabr kuni “O‘zbekiston madaniy merosi Rossiya Federatsiyasi to‘plamlarida” mavzuida davra suhbati tashkil etiladi.
Shuningdek, “O‘zbekiston madaniy merosi dunyo to‘plamlarida” 5 tomli kitobning taqdimoti bo‘lib o‘tadi.
14 sentyabr kuni esa o‘zbek xonandalari va san’at ustalari ishtirokida konsert tashkil etiladi.
Manba: qalampir.uz