«O‘zbeknavo» estrada birlashmasi 3 nafar xonandaning lisenziyasini to‘xtatdi va 11 nafar xonandaga ogohlantirish berdi. Bu haqda birlashmaning matbuot xizmati'ga asoslanib Kun.uz xabar berdi.
"O‘zbeknavo" estrada birlashmasi xonandalar Sobirov Anvar Karimovich, Rahmatova Esmeralda Najmiddinovna (Tamila) va Umarova Komila Rahmatulloyevna (Yagona)lar tomonidan O‘zbekiston Respublikasi Vazirlar Mahkamasining 2003 yil 11 noyabrdagi 498-sonli Qarori hamda lisenziya bitimida nazarda tutilgan talablar va shartlarni buzganligi sababli, xonandalar nomiga berilgan lisenziyaning amal qilishi “Faoliyatning ayrim turlarini lisenziyalash to‘g‘risida”gi O‘zbekiston Respublikasi Qonunining 22-24 moddalari hamda O‘zbekiston Respublikasi Vazirlar Mahkamasining 2003 yil 11 noyabrdagi 498-son Qarorining 1-ilovasi 35-bandiga asosan, 2015 yil 1 iyuldan to‘xtatilganligini va ilovadagi xonandalarga ogohlantirish berilganligini ma’lum qiladi", deyiladi xabarda.
Shuningdek, O‘zbekistonda xizmat ko‘rsatgan artistlar Mo‘minov Sobirjon Odiljonovich, Farmanov Ilhomjon Shomamatovich, Ismiyaminova Dilnoza Mirzatillaevna, "Nihol" mukofoti sovrindorlari Mirzajonov Yodgorbek Usmonalievich, Otaboyeva Shahnoza Hasanovna, Ubaydullaev Doston Rustamovich, Ortiqov Sherzodbek Sherbo‘taevich, hamda xonandalar Usmonov Masrurjon Marubdjanovich, Umirov Jasurbek Uvaydilloyevich, Hamidova Hilola Jo‘raevna, Shamsiev Umar Ahmedjonovichga ogohlantirish berilgan.
"O‘zbekiston Respublikasi qonunlari va Vazirlar Mahkamasi qarorlari talabini bajarish har bir xonanda va san’atkorning burchidir", deb qo‘shimcha qilinadi «O‘zbeknavo» estrada birlashmasi matbuot xizmatida.