Bollivud aktyori Saif Ali Xon va aktrisa Karina Kapur 20 dekabr, seshanba kuni o‘g‘il farzandli bo‘ldi, deb xabar bermoqda «Daryo» nashri.Ona va bolaning ahvoli yaxshi ekani, dunyoga kelgan yangi chaqaloqqa Taimur Ali Xon Pataudi deb ism berilgani ta’kidlanmoqda.
«Barchangiz bilan ajoyib yangilik borasida baham ko‘rmoqchimiz: o‘g‘limiz Taimur Ali Xon Pataudi 2016 yil 20 dekabr kuni dunyoga keldi. So‘nggi 9 oy davomida bizni tushungan va qo‘llab-quvvatlagan OAVga, ayniqsa, muxlislarga minnatdorchilik bildirmoqchimiz. Rojdestvo va Yangi yil muborak bo‘lsin. Muhabbat ila Saif va Karina», – deyiladi aktyor va aktrisaning bayonotida.
Ijtimoiy tarmoqlarda, xususan, Facebook’dagi The Mughal Empire of Hindustan sahifasida Saif Ali Xon va Karina Kapur o‘z o‘g‘lini Amir Temur sharafiga Taimur deb nomlagani aytilmoqda.
Mazkur post ostida ba’zi foydalanuvchilar bu safsata ekanini, boshqalari ism tanlash ota-onaning qarori ekanini ta’kidlagan.
Ma’lumot uchun, 46 yoshli Saif Ali Xon va 36 yoshli Karina Kapur 2012 yili turmush qurgan.