24 avgust kuni Prezident Islom Karimov “O‘zbekiston Respublikasi Mustaqilligining yigirma besh yilligi munosabati bilan fan, ta’lim, sog‘liqni saqlash, adabiyot, madaniyat, san’at, ma’naviyat va ma’rifat, ommaviy axborot vositalari hamda ijtimoiy soha xodimlaridan bir guruhini mukofotlash to‘g‘risida”gi farmonni imzoladi. Unga ko‘ra, xonanda Ulug‘bek Rahmatullaev O‘zbekistonda xizmat ko‘rsatgan artist unvoni bilan mukofotlandi. Quvonchi ichiga sig‘magan Rahmatullaev uni qo‘llab-quvvatlagan muxlislariga minnatdorchilik bildirib, quyidagi so‘zlarni yozib qoldirdi, deb yozmoqda “Qalampir.uz” nashri.“Bugun o‘zgacha kun bo‘ldi. Yaxshi niyatlar, albatta, ijobat bo‘ladi. Kichik mehnatimizni shunday katta unvon bilan taqdirlashganidan boshim osmonga etdi. Quvonchim cheksiz. Birinchi bo‘lib otam va onamga aytdim, ular ham juda quvonishdi. Shunday tinch va farovon yurtda yashayotganimiz, xotirjam ijod qilayotganimiz hamda ijod mahsullarimizni xalqimizga taqdim etayotganimiz uchun Yaratganga behisob shukr! Bu unvon yanada mas’uliyat yuklaydi, albatta. Yanada ijod qilishga undaydi. Yana bir bor hammaga tilaklar uchun katta rahmat Mana shu yurtda tug‘ilib, shu yurtga xizmat qilayotganimdan xursandman”.
Prezident farmoniga binoan, Ulug‘bek Rahmatullaevdan tashqari O‘zbek milliy akademik drama teatri aktyorlari Erkin Komilov “Fidokorona xizmatlari uchun” ordeni, Gavhar Zokirova va Zuhra Ashurova O‘zbekiston xalq artisti unvoni, xonanda Milena Madmusaeva O‘zbekistonda xizmat ko‘rsatgan artist unvoni, xonandalar Akbar Otamuhammedov, Manzura Yo‘ldosheva, Mashhurbek Raimjonov, aktrisa Nargiza Abdullaeva, aktyor Rasulxon Qodirxonov “Shuhrat” medali bilan taqdirlandi.