“Shuhrat” medali hamda “O‘zbekiston belgisi” ko‘krak nishoni egasi, O‘zbek Milliy akademik drama teatri artisti, taniqli kinoaktrisa Dilnoza Kubaeva - Toshkent shahridagi Inha universiteti mehmoni bo‘ldi. Bu haqda "Darakchi.uz" xabar berdi.Mehmon uchun eng avvalo universitetda yoshlar uchun yaratilgan shart-sharoitlar hamda bu erda ta’lim olayotgan talabalar hayoti bilan yaqindan tanishish maqsadida ekskursiya uyushtirildi. Kubaeva zamonaviy texnologiyalar bilan jihozlangan auditoriyalar, tajribalar o‘tkazish uchun mo‘ljallangan fizika laboratoriyalari, kutubxona hamda “Madaniyat va ma’rifat” xonasi bilan tanishdi. Shundan so‘ng talabalar bilan “Biz buyuk yurt farzandlarimiz” mavzusida uchrashuv o‘tkazildi.
Qayd etish joizki, uchrashuv ikki tomonlama iliq munosabat asosida o‘tdi. Eng avval talabalar o‘zlari tayyorlagan taqdimotni namoyish etishdi. Shundan so‘ng so‘z Dilnoza Kubaevaga berildi va u o‘z hayotiy tajribasidan, ustozlarining o‘gitidan kelib chiqqan holda ma’ruza qildi. Uchrashuv ochiq muloqat tarzida o‘tdi. Talabalar aktrisaga o‘zlarini qiziqtirgan savollarni berishdi va ularga Dilnoza Kubaeva tomonidan batafsil javob olishdi.
Dilnoza Kubaeva ham mana shunday muhtasham binoda, nufuzli universitetda ta’lim olayotgan yigit-qizlarga havasi kelayotganini, davlatimiz rahbari tomonidan yaratilgan bunday imkoniyatdan unumli foydalanib, ishonchni oqlashlari lozimligini aytib, ularning o‘qishlariga omad tiladi.