Foto: TripAdvisorIjtimoiy tarmoqlarda 14 yanvar oqshomida qo‘shni Tojikiston hududida joylashgan Qayroqqum suv omborida to‘g‘on yorilgani haqida mish-mishlar tarqaldi. Ko‘p o‘tmay O‘zbekiston Favqulodda vaziyatlar vazirligi ushbu axborot yolg‘on va hech qanday asosga ega emasligini ma’lum qildi. Suv xo‘jaligi vazirligi fuqarolarni bu kabi yolg‘on mish-mishlarga ishonmaslikka va xotirjamlikka chaqirdi.
Sirdaryo viloyat telekanali yangiliklar dasturining ichki ishlar boshqarmasiga asoslanib xabar berishicha, aholi orasida vahima uyg‘otuvchi noto‘g‘ri ma’lumot tarqatganlar qo‘lga olingan. Lavhadan ko‘rish mumkinki, ular jami 10 kishi. Qo‘lga olinganlar orasida ayol kishi va mahalliy bloger ham bor.
Kadr: Telegram
Qo‘lga olinganlardan biri shu xabarni eshitishi bilan o‘z ayoliga zudlik bilan akasinikiga borib turishni, o‘zi ham tez orada yetib borishini tayinlagan. Keyinchalik Tojikistonda yashovchi tog‘asidan bu xabar noto‘g‘riligini eshitadi, ammo bunga qadar hamma joyda vahima tarqalishga ulgurgani, qilgan ishidan afsusdaligini bildirgan.
Oqoltinlik bloger esa YouTube va Telegram tarmoqlaridagi o‘z sahifalarida «Qayroqqum suv ombori urib [o‘pirilib] ketdi, tezkor tarqating» sarlavhali ma’lumot joylagan.
«Ko‘proq odamlarga xabar berish maqsadida o‘zim tasvirga olgan videoni YouTube’ga joyladim. Keyin qarasam, ichki ishlar xodimlari ovoz kuchaytirgichlar orqali aholini tinchlantirib yurgan ekan. Darhol kirsam, joylagan lavham ‘prosmotr’ yig‘ishga ulgurgan ekan. Ya’ni bu lavham odamlar ko‘ngliga g‘ulg‘ula solishi mumkin. Blogerlarga maslahatim, biror xabarni tarqatishdan oldin yaxshilab tekshiring», — deydi u.
Yana bir erkak esa o‘zi yashovchi pod’ezddagi qo‘shnilari eshiklarini taqillatib chiqqani, bu orqali ularga tezroq xabar berishni istaganini, qilgan ishidan afsusdaligini bildiradi.
Ma’lumot uchun, Ma’muriy javobgarlik to‘g‘risidagi kodeksning 202-2-moddasi (yolg‘on axborot tarqatish) ikkinchi qismiga ko‘ra jamoat tartibiga yoki xavfsizligiga tahdid soluvchi yolg‘on axborotni tarqatish, shu jumladan, ommaviy axborot vositalarida, telekommunikatsiya tarmoqlarida yoki Internet jahon axborot tarmog‘ida tarqatish bazaviy hisoblash miqdorining ellik baravaridan yuz baravarigacha miqdorda jarima solishga sabab bo‘ladi.
Shuningdek, Jinoyat kodeksining 244-6-moddasi (yolg‘on axborot tarqatish) ikkinchi qismiga ko‘ra jamoat tartibiga yoki xavfsizligiga tahdid soluvchi yolg‘on axborotni tarqatish, shu jumladan ommaviy axborot vositalarida, telekommunikatsiya tarmoqlarida yoki Internet jahon axborot tarmog‘ida tarqatish, shunday harakatlar uchun ma’muriy jazo qo‘llanilganidan keyin sodir etilgan bo‘lsa bazaviy hisoblash miqdorining ikki yuz baravarigacha miqdorda jarima yoki uch yuz soatgacha majburiy jamoat ishlari yoxud ikki yilgacha axloq tuzatish ishlari yoki ikki yilgacha ozodlikni cheklash bilan jazolanadi.
Eslatib o‘tamiz, ushbu mish-mishlar 2020 yili Sardoba suv ombori to‘g‘onining yorilishi oqibatida jabrlangan Sirdaryo viloyatining Sardoba, Mirzaobod va Oqoltin tumanlari aholisi orasida vahima keltirib chiqargan. Ayrimlar uylarini zudlik bilan tark etishga uringan. Qayroqqum suv ombori Sardoba tumanidan 100 kilometr uzoqlikda joylashgan.
Sirdaryo viloyati hokimligi matbuot xizmatining ma’lum qilishicha, viloyat hokimi G‘ofurjon Mirzayev fuqarolarni tinchlantirish uchun mazkur tumanlarga kelgan. U odamlarni mish-mishlarga ishonmaslikka va vahimaga berilmaslikka chaqirgan.