Amal tegib…

Gulnora (ismlar o‘zgartirilgan) 2018 yilning so‘nggi oyidan Pastdarg‘om tumani maktabgacha ta’lim bo‘limi mudiri lavozimida ishlay boshladi. Endi u mansabdor, xizmat vazifalariga ko‘ra moddiy javobgar kishi. Qo‘lidagilar unga bo‘ysunadi, faqat ularni qanday «avrash» o‘ziga bog‘liq.

Ayol buni yaxshi uddaladi. Muassasa xodimlariga oylik ish haqi va boshqa mablag‘larni hisoblashni nazorat qilish, tadbirkorlik sub’ektlari bilan shartnoma tuzish kabi vakolatlaridan o‘z manfaati yo‘lida foydalandi. 2018 yil may oyida 8 nafar xodimga turli buyruqlarga asosan hayfsan berilgan. Shunday bo‘lsa-da, ularga ma’lum miqdorda rag‘batlantirish va yordam puli berish haqida soxta buyruq chiqarishgan. Rasmiy hujjatlarni qalbakilashtirish yo‘li bilan 7 mln. 931 ming 538 so‘m pulni talon-toroj qilgan.

Gulnora bu bilan cheklanmadi, aksincha, ishtahasi yanada ochildi. Bosh hisobchi va hisobchi bilan gapni bitta qildi. Amaldagi talablarga zid ravishda 56-MTM tarbiyachi yordamchisi S.Muhammadiyevaga 4 mln. 373 ming 610 so‘m, D.Qo‘yboqarovaga 3 mln. 855 ming 553 so‘m, 27-MTM xodimi V.Yo‘ldoshevaga 286 ming 754 so‘m tug‘ruq ta’tili pulini soxta hujjatlar bilan rasmiylashtirib, jami 8 mln. 515 ming 917 so‘m mablag‘ni o‘zlashtirdi.

Bundan tashqari, tuman MTBga kadrlar bo‘yicha mutaxassis sifatida 2017 yil dekabr oyida ishga qabul qilingan Dilnura aslida tumandagi pedagogika va sport kollejida kadrlar bo‘yicha mutaxassis hamda o‘qituvchi vazifasida 2017 yil dekabr oyidan 2019 yil iyun oyiga qadar buyruq asosida ishlab kelgan. Gulnora bundan foydalandi. Tuman MTBda faqat nomi ishlaydigan Dilnuraga 2019 yil yanvar-may oylarida 5 mln. 485 ming 403 so‘m ish haqi yozdirib, o‘z ehtiyojiga sarflagan.

Ikki joyda «ishlaydigan» Dilnura ham bo‘sh o‘tirmadi. Xalq ta’limi bo‘limining sobiq mudiri, hisobchilar va Gulnora bilan til biriktirib, intizomiy jazoga tortilgan bir nechta xodim nomiga rag‘batlantirish puli yozdirib, budjetdan 12 mln. 451 ming 118 so‘m pulni undirishga erishdi.

Bundan tashqari, hamtovoqlari bilan kelishgan holda Dilnura o‘zi va 6 nafar xodimga ish haqi yozilishiga erishib, 31 mln. 701 ming 304 so‘m pulni talon-toroj qilgan.

Sud majlisida sudlanuvchilar o‘zlarini oqlashga urinib, xodimlarga hayfsan berilgani, ammo ushbu intizomiy jazo tuman MTB mudiri hamda kasaba uyushmasining buyrug‘iga asosan muddatidan oldin olib tashlangani, hozirgi kunda esa ushbu buyruq yo‘qolganini bayon qilishdi. Dilnura va yana 6 xodim tuman MTBga 1 shtat birligiga qabul qilingani, MTB binosi bo‘lmagani sababli u va boshqa xodimlar o‘zlari ishlagan joyda ishlab turgani haqida ko‘rsatma berdi.

Sudlanuvchilarning aybi sudda fuqaroviy da’vogar va guvohlarning ko‘rsatmalari bilan o‘z tasdig‘ini topdi. Ularga 1 yil muddatga barcha korxona va tashkilotlarda mansabdorlik va moddiy javobgarlik vazifalarida ishlash huquqidan mahrum qilish va har oylik ish haqidan
20 foizini davlat hisobiga ushlab qolgan holda 2 yil axloq tuzatish ishlari jazosi tayinlandi.