Bosh prokuratura Telegram’dagi «Troll.uz» kanalida tarqalgan xabar yuzasidan o‘rganish o‘tkazadi. Kanalda COVID-19’ga topshirgan test natijasi «manfiy» chiqqan odamlarni karantinda ushlab turib, ma’lum muddat o‘tgach ularni koronavirus infeksiyasidan davolash uchun millionlab so‘m xarajat qilingani haqidagi hujjatlarga imzo qo‘ydirib olish holatlarining uchragani haqida post e’lon qilingandi. «Gazeta.uz» nashrining yozishicha, Bosh prokuratura matbuot xizmati bu borada o‘rganish o‘tkazilishini ma’lum qilgan.Kanalda tarqalgan axborot yuzasidan Bosh prokuraturaning Sog‘liqni saqlash, ta’lim va boshqa ijtimoiy sohalarda qonunchilik ijrosi ustidan nazorat boshqarmasi tomonidan o‘rganish o‘tkaziladi. Bosh prokuratura axborot xizmatining xabar qilishicha, O‘zbekistonda koronavirus epidemiyasi boshlanganidan beri kanalda qayd etilgan holatga o‘xshash vaziyatlar kuzatilmagan.
«Troll.uz» kanalining yozishicha, ijtimoiy tarmoqlarda odamlardan shunday qalbakilashtirilayotgan hujjatlarga imzo qo‘ydirish holatlari haqidagi postlar yetarlicha topiladi. Blog muallifi Umid G‘ofurovning aytishicha, u 50 nafar odamdan shunga o‘xshash holatlar bo‘yicha xabarlar olgan. Shuningdek, u ushbu vaziyatda dalillarni topish mushkulligi sababi karantin hududlarining ayrimlarida telefonlar olib qo‘yilishini ta’kidlagan.
«Qarindoshimni COVID-19’ga gumon qilib olib ketishdi. Testlar ‘manfiy’ deb topildi. Ammo undan 35 million so‘m miqdoridagi xarajatlar yozilgan hujjatlarga imzo qo‘yishni so‘rashgan. Ayol bunga javoban buncha puli yo‘qligini aytgan, shunda karantin hududidagilar hammasi davlat tomonidan to‘lanishini tushuntirgan», — deyiladi xabarlardan birida.
Boshqa maktublarda mualliflar ulardan 25 million so‘mlik hujjatlarga imzo qo‘yish so‘ralgani, ammo dorilar bemorlarning hisobidan xarid qilinganini yozib murojaat qilgan.
«Bemor vafot etganidan keyin 60 millionlik hujjatlarga imzo qo‘yishimizni so‘rashdi, aks holda mayitni bermasliklarini aytishdi. Janjal-to‘polondan keyin jasadni kasalxonadan olib ketdik», — deb yozgan boshqa bir fuqaro.
Shuningdek, yana bir xatda vafot etgan bemorning oilasiga 1500 ming AQSH dollari taklif qilingani va ulardan fuqaroning virusdan o‘lgani haqida hech kimga aytmaslik so‘ralgani bayon qilingan hamda oila karantinga olingani, ushbu pullar to‘lab berilgani aytilgan.
Yana bir murojaat Namangan viloyati To‘raqo‘rg‘on tumanidan yo‘llangan: «Hammadan o‘n millionlab pullar sarflangan muolajalar yozilgan hujjatlarga imzo qo‘yish so‘ralmoqda, shuning uchun ham ko‘pchilik, davlat amaldorlari pul ishlayotganini bilib, karantinga jiddiy munosabat bildirmay qo‘ydi».
2020 yil aprel oyida sog‘liqni saqlash vaziri Alisher Shodmonov koronavirus infeksiyasidan muolaja qilinayotgan bemorlarga 32 million so‘mdan 64 million so‘mgacha mablag‘ sarf qilinayotganini bildirgandi.
«Gazeta.uz»ning yozishicha, nashr vazirlikka COVID-19’ga chalingan bemorlarga ko‘rsatilayotgan tibbiyot xizmatlarining narxlarini oshkor qilish yuzasidan so‘rov yuborgan, ammo SSVdan bu borada hanuzgacha javob qaytarilmayapti.