Kurtka cho‘ntaklarida yashirilgan «gashish» fosh bo‘ldi

^{Foto: Davlat bojxona qo‘mitasi axborot xizmati}
Giyohvandlik vositalarining noqonuniy aylanmasiga qarshi bojxona organlari tomonidan tizimli ravishda kurash olib borilmoqda.

Davlat bojxona qo‘mitasi Kontrabandaga qarshi kurashish va bojxona auditi bosh boshqarmasi hamda “Toshkent-AERO” Ixtisoslashtirilgan bojxona kompleksi xodimlari huquqni muhofaza qiluvchi boshqa organlar bilan hamkorlikda Toshkent shahrida giyohvandlik vositalarining noqonuniy aylanmasiga qarshi tezkor tadbir o‘tkazishdi.

Tadbir davomida fuqaro A.F. tomonidan ijaraga olingan Mirzo Ulug‘bek tumanidagi xonadon o‘rnatilgan tartibda ko‘zdan kechirildi.

Xolislar va xizmat iti yordamida o‘tkazilgan tekshiruv davomida xonadondagi shkafda osig‘liq kurtka cho‘ntaklarida 74 gramm “gashish” giyohvandlik moddasi borligi aniqlandi.
Hozirda ushbu holat yuzasidan bojxona organlari tomonidan surishtiruv harakatlari davom ettirilmoqda.