Foto: RFE / RLO‘zbekiston Respublikasi tashqi ishlar vazirligi 31 may kuni O‘zbekiston-Qirg‘iziston davlat chegarasi «Chashma» uchastkasida ro‘y bergan mojaro bo‘yicha bayonot berdi.
«Voqea sabablarini ikki tomon rasmiy shaxslari o‘rganishi shuni ko‘rsatdiki, «Chashma» bulog‘ining ariqlarini birgalikda tozalash paytida yuzaga kelgan bahslashuv natijasida ikki mamlakatning ayrim fuqarolari o‘rtasida mojaro kelib chiqqan», deyiladi O‘zbekiston TIV matbuot xizmati xabarida.
Hodisa natijasida ikki tomondan ham jabrlanganlar bor. Ularga zarur tibbiy yordam ko‘rsatilgan.
Ikki mamlakatning chegaradosh viloyatlari rahbarlarining muzokaralari natijasida vaziyat to‘liq nazoratga olindi. Tomonlar bundan keyin oldindan kelishuvsiz tozalash ishlarini olib bormaslikka kelishib olishgan.
«Ta’kidlash joizki, «Chashma» bulog‘i O‘zbekiston Respublikasi va Qirg‘iziston Respublikasi aholisini ichimlik va sug‘orish suvi bilan ta’minlaydi. O‘zaro manfaatlarni inobatga olgan holda «Chashma» bulog‘idan birgalikda foydalanish to‘g‘risida kelishuv mavjud.
2020 yil 1 iyun kuni soat 09:00da O‘zbekiston Respublikasi Bosh vaziri A.Aripovning Qirg‘iziston Respublikasi hukumati rahbari v.b. K.Boronov bilan uchrashuvi bo‘lib o‘tdi.
Uchrashuvda ikki tomonlama hamkorlikka oid keng ko‘lamli masalalar muhokama qilindi. Transchegaraviy hamkorlikni rivojlantirish va chegarada yuzaga keladigan muammolarni do‘stlik, yaxshi qo‘shnichilik va strategik sheriklik ruhida, shuningdek, O‘zbekiston Respublikasi va Qirg‘iziston Respublikasi o‘rtasida 2017 yil 6 oktabrda imzolangan Chegara hududida ishonch choralari bo‘yicha Bitim qoidalariga muvofiq hal qilish to‘g‘risida kelishuvga erishildi.
Hukumat rahbarlari yaqin vaqt ichida Iqtisodiy hamkorlik bo‘yicha hukumatlararo komissiya yig‘ilishi va O‘zbekiston Respublikasining chegaradosh viloyatlari hokimlari va Qirg‘iziston hukumatining chegaraoldi hududlaridagi vakolatli vakillari Kengashini o‘tkazishga kelishib oldilar», deyiladi vazirlik xabarida.
Foto: Qirg‘iziston hukumati
Ikki mamlakat delegatsiyalari rahbarlari birgalikda mahalliy aholi bilan ham uchrashuv o‘tkazgan.
Bundan avvalroq Qirg‘iziston Sog‘liqni saqlash vazirligi chegaradagi mojarodan so‘ng 25 kishi Ayderken shahridagi kasalxonaga yotqizilgani haqida xabar bergandi.