“Titanik” kemasining halokatida omon qolgan ayol yo‘lovchilardan biri, taniqli britan dizayneri Lyusil Daff-Gordonning maktubi Bostondagi RR Auction kimoshdi savdo uyida 11,9 ming dollarga sotildi. Bu haqda Boston Herald gazetasi xabar berdi.
Daff-Gordon xonim va uning eri o‘z hayotlarini saqlab qolgan qayiq 40 kishiga mo‘ljallangan bo‘lsa-da, unga bor-yo‘g‘i 12 kishi olingan. Keyinchalik er-xotin kema ekipajiga pul berib, qolgan yo‘lovchilarni kutib o‘tirmay, kemani tark etganlikda ayblangan. Biroz o‘tib esa, ulardan bu ayblov olib tashlangan.
Matbuot er-xotin Daff-Gordonlar o‘z jonlarini saqlab qolgan qayiqqa “pul qayig‘i” deb nom berishgan. 1912 yilda Lyusil tomonidan dugonasiga yozilgan maktubda u jurnalistlar ustidan shikoyat qilib quyidagi so‘zlarni yozgan:
“Biz jonimizni saqlab qolayotganimizda xuddi noto‘g‘ri ish qilgandek taassurot paydo bo‘lyapti. Axir bu g‘azabni keltirmaydimi?”.
Maktubni sotib olgan odamning ismi oshkor qilinmadi.
Daff-Gordon 20 asr boshlaridagi eng etakchi britan modelerlaridan biri bo‘lgan. Uning Londondagi nufuzli modalar uyi shoxobchalari Parij, Nyu-York va Chikago shaharlarida faoliyat yuritgan.
Ma’lumot uchun, 1912 yilning 10 aprelida “Titanik” Angliyadagi Sautgempton portidan Nyu-Yorkka yo‘l olgan. To‘rt kun o‘tgandan so‘ng, umuman cho‘kmaydigan deb hisoblangan layner Shimoliy Atlantikada aysberg bilan to‘qnashuvdan keyin cho‘kib ketgan. Kema bortidagi 2224 nafar yo‘lovchidan 1,5 mingdan ziyodrog‘i halok bo‘lgan.
2012 yili “Titanik” kemasi orkestri rahbari, britaniyalik skripkachi Uolles Xartlining kema halokatga uchrashidan 5 kun oldin yozgan maktubi kimoshdi savdosida deyarli 155 ming dollarga sotilgan edi.
Manba: www.kun.uz