Buxorodagi “Pokiza insonlar” aksiyasini yakunlab, Toshkentga qaytish arafasidamiz. Bir joyda to‘xtab, xaydovchi tushib ketdi. Salonda dugonam ikkimiz. Mashina oynasini kimdir "tik-tik" etib chertdi. Tashqarida bir qizcha turar, bir narsalar derdi. Oynani tushirib, unga qarab qoldim, u esa qo‘lini cho‘zgancha tojikcha bir nimalar der. Tushunganim xudo yo‘liga sadaqa ber, chiroyli degani bo‘ldi. O‘zi tilanchilarga bermayman sadaqa. Ehson qutisiga tashlayman ko‘pincha. Lekin bu qiz, uni ko‘zlari... Yashil deymi yoki xaki rang... Ko‘zlari tiniq, dardli edi. Cho‘ntagimdan pul chiqarib berdim. Ko‘zim uni ko‘zlarida. U esa bir nimalar deb duo qilar.
-Qiziy, ko‘zlaring chiroyli ekan o‘zingga o‘xshab!
-Rahmat, apajon, siznikiyam chiroylik...
U ketdi. Ortiga o‘girila-o‘girila, yuzida xayronalik. Ishonchim komil, shu paytgacha bironta odam unga bunday demagan. Bir yoshi katta ayolni yoniga bordi. Onasi deb o‘yladim.
Biroz kuzatgach, mashinadan tushib, o‘sha ayolni oldiga bordim. Uni qo‘lida chaqaloq. Ro‘mollar o‘rab olgan, oriqqina.
-Assalomu alaykum, kenayi! Sizni qizizmi? dedim tabassum bilan.
-Assalom! Yo‘q, jiyanim. Onasi o‘lib ketgan. 4 bola qoldi. Man o‘zimni bollarim bilan qarayapman.
-Tilanchilik qilibmi? Ishlasangiz bo‘lmaydimi?
-Bolalarim yosh (doimiy gaplar...).
-Bu qizni ko‘zlari buncha chiroyli ekan. Maktabga nega bormayapti?
-Endi boradi. Qarashyapti menga.
Qiz hadiksirab turibdi. Unga yuzlanib:
-Xoy asal qiz, kim bo‘lmoqchisan katta bo‘lsang? Biror narsaga qiziqasanmi?
-Tikuvchi bo‘lgim keladi. Lekin tikishni bilmayman-da.
-Xechqisi yo‘q, o‘rganib olasan! Chiroyli ko‘ylaklarni dizaynini yaratasan. Hali judayam baxtli qiz bo‘lib ketasan-ki. Zo‘r bulib ketasan, eng go‘zali bo‘lasan! Faqat o‘qigin, xo‘pmi, asalim?
Qizni tomog‘iga bir nima qadalib qoldi. Ko‘zlari qizarib ketayapti. Yutinib, zo‘rg‘a:
-Xo‘p! dedi...
Ko‘z tegmasin senga deb xayrlashdim.
To‘g‘ri, u lo‘lidir. Lekin u ham inson. U ham baxtga, komillikka, yaxshi gapga arzirli odam bolasi. Ko‘zlari chiroyli, dardli, qiz...
Qizlarga, ilm bering, mehr bering!
Manba: Azon.uz