O‘zbekiston “Milliy tiklanish” demokratik partiyasi vakili Mirodil Abdurahmonov bugun O‘zbekiston tadbirkorlarini qiynayotgan muammolar hamon o‘z yechimini topmayotganini ma’lum qildi. Bu haqda O‘z A muxbiri xabar
bermoqda.
Xalqaro press-klubning press-kofe muloqotida partiya vakili tadbirkorlar yer mulkiga egalik qilish huquqini himoya qila olmayotgani haqidagi fikrini o‘zining yaqin tanishlari misolida keltirib o‘tdi. U “O‘zbekiston tadbirkorlari partiyalarni har qancha tavqi la’nat qilsa arziydi”, deya keskin munosabat bildirdi.
Mirodil Abdurahmonov farmon va qarorlar tadbirkorlar faoliyatini qo‘llab-quvvatlashga yo‘naltirilgani, biroq ularning ijrosi ta’minlanmayotganini ochiq tan olishimiz lozimligini ham aytib o‘tdi.
Muloqotda O‘zbekiston Respublikasi Oliy Majlisi qonunchilik palatasi, siyosiy partiyalar, savdo-sanoat palatasi, biznes ombudsman vakillari va tadbirkorlar ishtirok etmoqda.
Eslatib o‘tamiz, Mirodil Abdurahmonov ancha yillar O‘zbekiston tadbirkorlar va ishbilarmonlar harakati — O‘zbekiston liberal demokratik partiyasining bosh nashri “XXI asr“ gazetasida uzoq yillar bosh muharrir lavozimida ham faoliyat yuritgan. Ayni paytda esa “Milliy tiklanish“ partiyasida faoliyat yuritmoqda.