Foto: BBCBBC sog‘liqni saqlash sohasi ekspertlari o‘zbek milliy taomlarining sog‘liq uchun foydali jihatlari talaygina ekanini ta’kidlamoqda, deb xabar beradi Turizmni rivojlantirish qo‘mitasi matbuot xizmati.
«Buyuk Ipak yo‘li bo‘ylab joylashgan O‘zbekiston qachonlardir boshqa davlatlar bilan tovar hamda g‘oyalar almashinuvi ro‘y bergan yurt. Bu mamlakat madaniyatining rivojlanishiga imkon bergan, ajoyib mozaikalar, hunarmandchilik mashulotlari, san’at namunalari va ayniqsa, taomlar shundan dalolat beradi», — deyiladi BBC’da chop etilgan o‘zbek taomlari haqidagi maqolada.
Unda o‘zbek oshxonasining boy va mazali ekanligi alohida ta’kidlangan.
«Ba’zi taomlar retseptlari go‘shtga boy bo‘lsa, boshqalari un, guruch, sabzavotlar, shuningdek ziravorlardan iborat bo‘ladi. Ushbu ingridiyentlar yordamida o‘zbek oshpazlari biri-biridan ajoyib taomlar – chuchvaradan tortib kabobgacha tayyoralashadi», — deyiladi manbada.
Maqolada shuningdek o‘zbek taomlarining retseptlari har bir hududda o‘ziga xos ekanligi alohida qayd etilgan. Eng mashhur milliy taomlar sifatida somsa, lag‘mon, norin, sho‘rva, kabob, manti, palov va patir non e’tirof etilgan.
«VIII asrga borib bu yerlarda islom dini tarqala boshladi va shaharlarda madrasa hamda masjidlar ko‘paydi. Buxoro muhim ahamiyatga ega ta’lim markazi hisoblanib, butun dunyo musulmon olami ziyolilari g‘oyalar almashish uchun shu yerda to‘planardi. Aynan shunday muhitda O‘zbekistonning zamonaviy oshxonasi shakllana boshladi. Butun dunyo savdogarlarining Buyuk Ipak yo‘li bo‘ylab harakatlanishi ajoyib natijaga olib keldi. Bugunga kelib o‘zbek milliy taomlarida turk, qozoq, uyg‘ur, mo‘g‘il va boshqa madaniyatlarning ta’sirini ko‘rish mumkin», - deyiladi maqolada.
Maqolada O‘zbekistonning eng mashhur milliy taomi sifatida palov keltirilgan bo‘lib, uning barcha bayramlar va maxsus sanalarda tayyorlanishi qayd etilgan.
Avvalroq O‘zbekiston noto‘g‘ri ovqatlanish oqibatida o‘lim ko‘rsatkichi eng yuqori mamlakatlar reytingida yetakchi ekanligi haqida xabar berilgan edi.
Gastroenterolog Lola Abdurahmonovaning ta’kidlashicha, muammo milliy taomlarda emas, o‘zbek xalqining odatiy turmush tarzida. Mutaxassisning so‘zlariga ko‘ra, kun bo‘yi mehnat qiluvchi kishilar uchun o‘zbek taomlari foydali, gap uni me’yorida iste’mol qilishda. «Salomatlik bilan bog‘liq muammolar uch sabab tufayli yuzaga keladi: haddan tashqari ko‘p taom iste’mol qilish, kamharakat hayot tarzi hamda taomnomada xilma-xillikka rioya qilmaslik», — deydi u.