Turizmni rivojlantirish qo‘mitasi Saylgoh ko‘chasida Toshkent shahar hokimligi bilan hamkorlikda «Gastro Bazaar—2019» birinchi xalqaro gastronomik festivaliga start berdi. Bu haqda qo‘mita matubot xizmati xabar berdi.Tadbirni Turizmni rivojlantirish qo‘mitasi raisi vazifasini bajaruvchi Abdulaziz Oqqulov hamda Toshkent shahar hokimi o‘rinbosari Elbek Shukurov ochib berdi. Shuningdek, tantanali ochilish marosimida UNWTO, ICCA, Turkiya Oshpazlar uyushmasi hamda Turkiya Gastronomik akademiyasidan taklif qilingan xalqaro ekspertlar ham ishtirok etdi.
«Hududlarning turistik jozibadorligini oshirishga imkoniyat yaratib berish oldimizdagi muhim vazifalardan biri bo‘lib qolmoqda. Rivojlangan davlatlar tajribasiga qaraydigan bo‘lsak, gastronomiya va turizm o‘rtasidagi aloqalar sayyohlar oqimini ko‘paytirish hamda ularning safar kunlarini uzaytirishga yordam beradi», — dedi Abdulaziz Oqqulov.
11 avgustga qadar davom etadigan tadbir O‘zbekistonning xalqaro darajadagi gastronomik salohiyatini oshirish va mamlakat turistik brendini tanitish yo‘lida xizmat qiladi.
Bugun, 10 avgust kuni Saylgoh ko‘chasida milliy va jahon oshxonalarining mahorat darslari, oshpazlar bellashuvlari, ko‘ngilochar tadbirlar namoyishi kutilmoqda. Shu bilan birga, Turizmni rivojlantirish qo‘mitasi tomonidan e’lon qilingan hududlarning turizm logotiplari bo‘yicha tanlov g‘oliblarini taqdirlash marosimi ham bo‘lib o‘tadi.
