Samarqand viloyatida 2014 yilda 41ta qishloq massivida namunaviy loyihalar asosida 1 ming 127ta uy-joy qurildi. Bu haqda «Zarafshon» gazetasi'ga asoslanib «Kun.uz» xabar bermoqda
.
Xususan, Nurobod tumanida 30 ta yangi uy-joylar barpo etildi. “Tim qishlog‘idagi paxsa devorli uyda istiqomat qilib kelardik. Yaqinda uch xonali yangi uyga ko‘chib o‘tdik. Bunday uyda maza qilib yasharkan kishi”, – deydi “Nurbuloq» mahallasidagi yangi xonadon sohibi Nuriddin Halimov.
“Mehmonxona, bolalarga alohida xona, uy bekalari uchun zamonaviy oshxona, hammom, avtomobil qo‘yish uchun garaj mavjud. Qurilish qilishim, u yoq-bu yoqni suvashim kerak, deb o‘ylamaysiz. Uyimizdagi sharoit shahardagidan ham ziyod. Eng quvonarlisi, yangi yilni yangi uyda kutib oldik”, – deydi Halimov.
Umuman, O‘zbekiston Prezidenti tomonidan 2009 yil avgustda qabul qilingan “Qishloq joylarda uy-joy qurilishi ko‘lamini kengaytirishga oid qo‘shimcha chora-tadbirlar to‘g‘risida”gi qaroridan so‘ng viloyatda 3,3 mingdan ziyod barcha shart-sharoit va qulayliklarga ega uylar qurildi.