Majburiy ijro byurosi xodimlarining qarzdor fuqarolar tomonidan kaltaklanishi haqda tez-tez xabarlar tarqaladi. Bu safar Kattaqo‘rg‘on tumanida tuman elektr tarmoqlari xodimi Majburiy ijro byurosi inspektorini kaltaklagani haqda ma’lumot tarqaldi. Bu haqda Samarqand viloyat Majburiy ijro byurosi xabar bermoqda. Ma’lum bo‘lishicha, Kattaqo‘rg‘on tuman elektr tarmoqlari korxonasi xodimi Yu.N mast holatda o‘ziga tegishli «Nexia» avtomashinasida tumanning Kadan qo‘rg‘onchasidan o‘tuvchi ichki yo‘lida boshqarib ketayotganda tanish MIB inspektorini ko‘rib qolgan. MIB xodimiga o‘zini yordamchi ko‘rsatib, noqonuniy elektrga ulangan iste’molchini bilishi, istasa ko‘rsatishini aytadi.
Elektr tarmoqlariga noqonuniy ulanish – o‘g‘irlik. MIB inspektori darrov rozi bo‘lib mashinaga o‘tiradi. Ammo chekkaroq joyga borganda mashina to‘xtaydi va elektr tarmoqlari xodimi «Mana senga noqonuniy «tochka» degancha MIB inspektoriga tashlanadi. Inspektorga bir necha musht tushirib, uning xizmat formasini yirtib ham yuboradi.
Elektr tarmoqlari xodimi shuningdek, inspektorning xizmatda foydalanib kelayotgan sumkasini, uyali telefonini, aholidan yig‘ilgan 4 mln. 800 ming so‘m naqd pullarini olib qo‘yib, hodisa joydan qochib ketadi.
Tezkor tadbirlar natijasida zo‘ravon va talonchi Yu.N. mast holatda qishloq chetidagi qabriston yonida qo‘lga olindi.
Mazkur holat yuzasidan Kattaqo‘rg‘on tuman prokuraturasi tomonidan tergovga qadar tekshirish harakatlari olib borilmoqda.