Samarqandda Nexia va Damas to‘qnashdi, 2 haydovchi ham halok bo‘ldi

^{Foto: Zarnews}
Shu yil 7 iyun kuni soat 19:30 atrofida Toyloq tumani Shokkash mahallasi hududidan o‘tuvchi «Toyloq—Urgut» yo‘lining 3-kilometrida YTH sodir bo‘ldi. Bu haqda IIV jamoatchilik va OAV bilan aloqalar boshqarmasi ma’lum qildi.

Samarqand viloyatining Urgut tumanida yashagan 47 yoshli B.B. Nexia rusumli avtomobilini haydab ketayotib, boshqaruvni eplay olmay, yo‘lning qarama-qarshi tomoniga chiqib ketadi va Toyloq tumanida yashagan 27 yoshli A.H. boshqaruvidagi Damas rusumli mashina bilan to‘qnashuv sodir etadi. To‘qnashuv tufayli Damas yo‘l chetidagi ariqga tushib ketgan.

Hodisa oqibatida ikki haydovchi ham kasalxonaga olib ketilayotganda vafot etdi. Holat yuzasidan jinoyat ishi qo‘zg‘atilib, hozirda tergov harakatlari olib borilmoqda.