Jamoat joylarida chekkanlik uchun eng kam oylik ish haqining 1/3 qismi hajmida jarima belgilanadi. Bu haqda Uz24.uz xabar bermoqda.Prezident tomonidan imzolangan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risidagi qaroriga muvofiq, O‘zbekistonda birinchi marta jamoat joylarida chekkanlik uchun jarimalar joriy qilindi.
Unga ko‘ra, ish joylarida, sog‘liqni saqlash, ta’lim, sport-sog‘lomlashtirish muassasalarida, yong‘in chiqish xavfi bo‘lgan joylarda, shu jumladan avtomobillarga yoqilg‘i quyish shoxobchalarida va boshqa jamoat joylarida tamaki mahsulotini iste’mol qilish (tamaki mahsulotini iste’mol qilish uchun maxsus ajratilgan joylar va xonalar bundan mustasno) eng kam ish haqining uchdan bir qismi miqdorida jarima solishga sabab bo‘ladi.
Tamaki mahsulotlarini mahalliy va uzoqqa qatnaydigan poezdlar, kemalar, shahar atrofiga qatnaydigan poezdlar, shahar ichida va shahar atrofiga qatnaydigan, shaharlararo va xalqaro qatnovdagi avtobuslarda, shuningdek, taksi, yo‘nalishli taksi va shahar elektr transportida iste’mol qilganlik uchun jarima eng kam oylik ish haqining 1/20 qismidan 1/3 qismigacha oshirildi. Tamaki mahsulotlarini havo kemalarida iste’mol qilish avvalgidek eng kam oylik ish haqining 2 barobaridagi jarima bilan jazolanadi.